Fyrningarfrumvarp klauf nefnd

Allsherjarnefnd klofnaði í afstöðu sinni til fyrningarfrumvarps Ágústs Ólafs Ágústssonar í gær. Meiri hluti nefndarinnar taldi rétt sem fyrsta skref að hækka lágmarksaldurinn upp í 18 ár og lengja þar með fyrningarfrestinn um fjögur ár. Jafnframt að senda önnur atriði málsins til athugunar í dómsmálaráðuneytinu. Að áliti þessa efnis stóðu alþingismenn Sjálfstæðisflokks, Framsóknarflokks og Frjálslynda flokksins. Minni hluti nefndarinnar vildi að frumvarpið færi óbreytt í gegnum hana en það gerir ráð fyrir afnámi fyrningarfrests vegna allra kynferðisafbrota gegn börnum undir 14 ára aldri. Samkvæmt núgildandi lögum eru fyrningarfrestir frá 5 árum upp í 15 ár. "Ég stend að þessu nefndaráliti með fyrirvara og hef áskilið mér að leggja fram breytingartillögu. Ég vil ganga lengra" sagði Jónína Bjartmarz alþingismaður. "Ég vil gera mismun á þessum brotum eftir grófleika þeirra, alvarleika og hámarksrefsingunni sem lögð er við. Mér finnst horfa allt öðru vísi við með grófu brotin, kynferðislegt ofbeldi, samræði og önnur kynmök heldur en með kynferðislega áreitni. Ég hef ekki getað fallist á mál Ágústs Ólafs af þessum sökum, þó ég hefði viljað mæta sérstöðu þessara brotaþola með því að breyta fyrningarreglunum." Jónína kvaðst hafa staðið að nefnarálitinu í trausti þess og trú að það væri almenn samstaða og vilji til þess að hefja endurskoðun á öllum kynferðisbrotakaflanum. Hægt væri að hugsa sem svo að rétt væri að lengja fyrningarfrestinn hvað grófustu brotin varðaði og hækka refsirammann í kjölfarið. " Það er mikill sigur að ná málinu úr nefndinni, en vonbrigði að stjórnarmeirihlutinn treysti sér ekki til að viðurkenna sérstöðu þessara brota með því að gera þau ófyrnanleg," sagði Ágúst Ólafur. "En nú fer málið í þingsalinn. Þar verður það rætt og kosið um það. Ég mun berjast fyrir því áfram að kynferðisbrot gegn börnum verði ófyrnanleg. Það er grundvallaratriði."