Segir menningarslys í uppsiglingu

Ólafur F. Magnússon, borgarfulltrúi Frjálslynda flokksins, gagnrýndi sölu Heilsuverndarstöðvarinnar við Barónsstíg á fundi borgarráðs Reykjavíkur í gær. Ólafur finnur sölunni flest til foráttu og segir hana einhverja verstu gjörð sem borgarstjórn Reykjavíkur hafi staðið fyrir um langt árabil enda muni hún valda heilbrigðisþjónustunni í höfuðborginni óbætanlegu tjóni.

Þá lýsi salan fullkomnu virðingarleysi fyrir þeirri hugsjón sem leiddi til þess að húsið var byggt á sínum tíma. "Reynslan sýnir að bæði borgarfulltrúar R- og D- lista ganga hart fram gegn hagsmunum almennings og menningarsögu borgarinnar þegar um er að ræða þjónkun við byggingaverktaka. Menningarsögulegt slys virðist þannig í uppsiglingu," segir í bókun Ólafs á fundi borgarráðs í gær.