Eldur í Breiðholti

Eldur kviknaði í viftu í eldhúsi í íbúð á fjórðu hæð í fjölbýlishúsi í Vesturbergi 138 í Breiðholti um miðjan dag á sunnudag. Allt tiltækt slökkvilið á höfuðborgarsvæðinu var kallað út en helmingurinn var kallaður aftur í höfuðstöðvar slökkviliðs þar sem ekki var um mikinn eld að ræða. Slökkviliðið náði að slökkva eldinn fljótt og örugglega. Töluverður reykur var í íbúðinni og voru sjö íbúar fluttir á Landspítala - háskólasjúkrahús vegna gruns um reykeitrun en enginn þeirra slasaðist alvarlega. Ekki er ljóst hve miklar skemmdir urðu á íbúðinni, en þó ljóst að reykskemmdir hafa verið einhverjar.