Þeistareykir og Landsvirkjun semja

Stjórn Þeistareykja hefur ákveðið að ganga til viðræðna við Landsvirkjun um orkuöflun fyrir álver á Norð-Austurlandi. Bæði Landsvirkjun og Orkuveita Reykjavíkur höfðu lýst yfir áhuga á að eignast hlut í Þeistareykjum ehf. en Hreinn Hjartarson, veitustjóri Orkuveitu Húsavíkur, segir að Landsvirkjun hafi orðið fyrir valinu þar sem aðkoma Landsvirkjunar að frekari orkuöflun í Þingeyjarsýslum auki lýkur á nýju álveri á Norð-Austurlandi. Hreinn segir að Þeistareykjavirkun muni geta annað um þriðjung af orkuþörf nýs álvers í nágrenni Húsavíkur. "Það verður hins vegar ekki ráðist í Þeistareykjavirkjun nema til komi álver eða önnur stóriðja á Norð-Austurlandi. Þeistareykir ehf. hafa nú þegar lagt nokkur hundruð milljónir króna til rannsókna á svæðinu en með aðkomu Landsvirkjunar að málinu verður frekari rannsóknum á Þeistareykjum flýtt," segir Hreinn.