Hæfi Halldórs ekki á dagskrá

Formaður fjárlaganefndar ætlar ekki að taka skýrslu ríkisendurskoðunar um hæfi forsætisráðherra til umræðu á fundi nefndarinnar á morgun. Stjórnarandstaðan segir skjóta skökku við að forsætisráðherra hafi kynnt skýrsluna sjálfur. "Þetta mál er ekki á dagskrá á fundi fjárlaganefndar því við erum að ræða allt aðra hluti," segir Magnús Stefánsson, formaður fjárlaganefndar, aðspurður um hvort niðurstaða ríkisendurskoðunar um hæfi forsætisráðherra verði á dagskrá nefndarinnar á fundi í dag. Magnús segir ekkert ljóst hvort að málið verði tekið upp á seinni stigum. "Ég hef aldrei efast um hæfi Halldórs í þessu máli. Þessi sjónarspil stjórnarandstöðunnar eru skot út í loftið og alls ekki við hæfi." Guðjón A. Kristjánsson, formaður Frjálslynda flokksins, segir að honum komi niðurstaðan á óvart og að hann telji nauðsynlegt að fá lagalegt álit vegna málsins. "Ég hélt að sú skylda sem lögð var á menn samkvæmt stjórnsýslulögunum væri þannig að menn ættu að segja sig frá málum þar sem um vensl eða hagsmuni væri að ræða. Ég er ekki búinn kyngja því að Halldór hafi ekki verið vanhæfur og þetta mál þarf að skoða betur," segir Guðjón. Lúðvík Bergvinsson, þingmaður Samfylkingar, segir að honum finnist óðagot að boða til fundar með hálftíma fyrirvara. "Það bendir ekki til mikillar yfirvegunar. Í öðru lagi þá kemur fram í áliti ríkisendurskoðunar að það sé ekki hennar hlutverk að fjalla um lögfræðileg álitaefni og sú spurning vaknar hvers vegna hún var þá að taka málið upp að eigin frumkvæði. Í þriðja lagi finnst mér einkennilegt að sá sem rannsóknin beinist að, er látinn kynna skýrsluna." Ögmundur Jónasson, þingflokksformaður Vinstri-grænna, segir það með ólíkindum að forsætisráðherra lesi upp fyrir fréttamenn valda kafla úr skýrslu um meinta spillingu sína sem samin er að af eftirlitisaðila Alþingis. "Í mínum eyrum hljómar þetta frekar sem upphaf en endir." Einar Oddur Kristjánsson, þingmaður Sjálfstæðisflokksins, segir athugunina án alls samráðs við fjárlaganefnd. "Þetta er að frumkvæði ríkisendurskoðunar og okkur algjörlega óviðkomandi. Ríkisendurskoðandi var á fundi okkar að kynna ákveðin atriði í skýrslu sinni um einkavæðingarferlið en ekki neitt hvað þetta varðar."