Komið í veg fyrir leka

Fjölmennt lið slökkviliðs og lögreglu var í viðbragðsstöðu þegar Lagarfoss, leiguskip Eimskipafélagsins, lagðist að bryggju við Grundartanga í gærmorgun. Komið hafði verið fyrir leka í ammóníaksgámi, sem upp hafði komið þegar skipið var undan ströndum Skotlands, en slökkvilið hafði viðbúnað við höfnina þegar skipið bar að til að tryggja að frekari leki úr gámnum kæmi ekki fram þegar hann yrði affermdur. Ákveðið var að afferma gáminn við Grundartangahöfn þar sem búist var við hagstæðri vindátt á Grundartanga. Skipið kom að bryggju um klukkan tíu og fljótlega var farið að afferma aðra gáma en þann þar sem lekans hafði orðið vart. Um tíu eiturefnakafarar frá Slökkviliði höfuðborgarsvæðisins voru í viðbragðsstöðu. Þegar gámnum hafði verið komið fyrir á öruggu og afgirtu svæði hófu eiturefnakafararnir að afferma gáminn og skiptust þeir á tveir og tveir í einu þar sem um erfitt og vandasamt verk var að ræða. Alls voru fimm stórir ammóníakskútar í gámnum og fljótlega var ljóst að einn þeirra lak. Þegar ljóst var hver þeirra það var, var sá kútur fluttur á sérstakt svæði þar sem komið var fyrir lekann en kúturinn mun hafa lekið út frá lokunarbúnaði kútsins. Birgir Finnsson, sviðsstjóri hjá Slökkviliði höfuðborgarsvæðisins sem stjórnaði starfi á vettvangi, sagði að aðgerðin hefði heppnast vel í alla staði. Viðbúnaður af því tagi sem var við höfnina hafi verið mikill þar sem gæta þurfi fyllsta öryggis þegar um eiturefni af því tagi sem um ræðir er til staðar. Aðgerðum slökkviliðs var lokið upp úr hádegi en Lagarfoss sigldi fljótlega af stað til annarra verkefna eftir að hafa affermt gáminn.