Vara við álveri í Eyjafirði

Samtök um fjölbreytta atvinnuuppbyggingu í Eyjafirði voru stofnuð á fjölmennum fundi á Akureyri þann 28. maí síðastliðinn. Samtökin vara eindregið við þeirri stefnu stjórnvalda að einhæfa atvinnulíf þjóðarinnar með enn einu álveri, hugsanlega við Eyjafjörð. Í tilkynningu segir að auk einhæfni í atvinnulífi leiði nýtt álver til enn frekari landspjalla vegna virkjana og efnamengunar lofts, láðs og lagar umhverfis álverið. Auk sjónmengunar og aukinnar losunar á gróðurhúsalofttegundum spillir álver ásýnd Eyjafjarðar sem vistvæns matvælaframleiðslusvæðis. Nær væri að Ísland sýndi fordæmi með því að draga úr mengun, vernda sérstæða og óspillta náttúru og framleiða hollustufæði. Því leggjast samtökin gegn því að bygging álvers á Norðurlandi verði fest í sessi með undirritun „viljayfirlýsingar“ milli Akureyrarbæjar og bandaríska álrisans Alcoa. Samtök um fjölbreytta atvinnuuppbyggingu í Eyjafirði leggja til að stefnt verði að öflugri starfsemi í sátt við náttúru og umhverfi sem fellur að þeirri starfsemi sem er nú þegar til staðar í Eyjafirði. Þau segja nóg komið af álverum sem „eyðileggi aðra atvinnustarfsemi“ þannig að störf flytjist úr landi í stórum stíl vegna áframhaldi hárri skráningu íslensku krónunnar. „Einnig bendum við á að algert bráðræði er að binda hendur komandi kynslóða með þessari ótímabæru „viljayfirlýsingu“ um afsal á allri framtíðarorku á Norðurlandi til eins fyrirtækis,“ segir ennfremur í tilkynningunni.  Bjarni E Guðleifsson, formaður samtakanna, segir að um fimmtíu manns hafi verið á stofnfundinum. Hann segir að þau eigi afskaplega mörg skoðanasystkin á svæðinu. Bjarni segir að enn sem komið er sé ekki mikill hiti í mönnum en það kunni að breytast.