Samstarf eflt við Gæsluna

Á fimmta landsþingi Slysavarnafélagsins Landsbjargar, sem hófst á Akureyri í gær, var undirritaður nýr samstarfssamningur félagsins og Landhelgisgæslunnar. Samninginn undirritaði einnig Björn Bjarnason dómsmálaráðherra, en báðir samningsaðilar heyra undir ráðuneyti hans. Að sögn Jóns Gunnarssonar, upplýsingafulltrúa Landsbjargar, er samningurinn einkum gerður til að hámarka nýtingu björgunarskipaflotans sem Landsbjörg hefur byggt upp hringinn í kring um landið. "Tilefnið er fjölgun stórra björgunarskipa sem félagið hefur staðið fyrir, " sagði Jón í samtali við Fréttablaðið. Í gangi sé lokaátak í því verkefni félagsins að fjölga björgunarflotanum í fjórtán stór skip. Eftir sé að endurnýja eldri skip á Vopnafirði, Siglufirði og Patreksfirði. Jón segir samninginn kveða á um að Landhelgisgæslan muni nýta þessi skip til björgunar og hjálparstarfa auk annarra tilfallandi verkefna. "Það gerði til dæmis gæfumuninn að svona skip var á Raufarhöfn í dag og bjargaði tveimur mönnum úr björgunarbát," segir Jón. Inntak samningsins dregur Jón saman í þessum orðum: "Þessir aðilar eru að taka höndum saman um að skipuleggja sína starfsemi þannig að nýting á tækja- og mannafla verði betri en hún er í dag."