Höfuðstöðvar Eimskips að hóteli

Þar sem áður var leikið með fjöregg þjóðarinnar, þar sem auðmenn landsins réðu ríkjum, býðst nú þreyttum ferðalöngum að hvíla lúin bein. Höfuðstöðvar Eimskips eru orðnar að hóteli. Hakakrossinn setti lengi vel mark sitt á eina voldugustu byggingu borgarinnar. En þar sem áður var merki óskabarns þjóðarinnar stendur nú „1919“, merki hins nýja hótels Í dag var unnið hörðum höndum við lokafrágang enda von á fyrstu gestunum strax á morgun. Hætt er við að fyrrverandi starfsmenn Eimskips þekki ekki lengur gamla anddyri fyrirtækisins, nú þegar það er orðið að gestamóttöku. Viðarinnréttingarnar voru rifnar út og öllu breytt. Fæst herbergjanna eru eins, enda þurfti oft að finna frumlegar lausnir til að geta komið hóteli fyrir í byggingu sem hýsti í yfir áttatíu ár skrifstofur skipafélags. Svart, grátt og hvítt eru ríkjandi litir á hótelinu og hugsanlegt að einhverjum þyki nóg um þegar að vetrardrunginn leggst yfir höfuðborgina. Eigendur hótelsins gera sér hins vegar vonir um vinsældir, nema hvað, að velstæðir, erlendir gestir vilji sofa rótt í miðborginni og svo skemmta sér á barnum þar sem vonir hótelstjórnenda standa til þess að fræga fólkið á Íslendi sæki þegar fram líða stundir. Íslenskur aðall á því ekki að hverfa fyrir fullt og allt úr Eimskipshúsinu.