Allsherjarverkfall í Simbabve

Tveggja daga allsherjarverkfall hófst í Simbabve í gær. Til verkfallsins var boðað til að mótmæla aðgerðum ríkisstjórnar Robert Mugabe, sem hefur nú látið handtaka meira en þrjátíu þúsund fátæka íbúa landsins fyrir litlar sem engar sakir. Áætlun Mugabes til að draga úr fátækt í landinu hefur svipt fjölda fólks heimili sínu og nú er svo komið að í landinu eru um 200 þúsund heimilislaus. Stjórnarherinn hafði mikinn viðbúnað í gærmorgun þegar verkfallið hófst, til að koma í veg fyrir uppsteyt. Mótmæli fóru þó að mestu leyti friðsamlega fram.