Hætta borun eftir heitu vatni

Borun eftir heitu vatni á Berserkseyri á Snæfellsnesi hefur verið hætt í bili. Borstangir brotnuðu í vinnsluholunni og er búið að reyna í sex vikur að ná þeim upp. Búið var að hitta á aðra af tveimur vatnsæðum sem ætlunin var að ná í og virðist sú gefa allt að 30 lítra á sekúndu af tæplega áttatíu gráðu heitu vatni. Á vef Skessuhorns segir að það uppfylli þörf Grundfirðinga fyrir heitt vatn en hún er 20-25 sekúndulítrar. Á fundi bæjarstjóra með sérfræðingum í gær var ákveðið að ráðast í frekari rannsóknir á borholunni og vatninu í henni, áður en ákvörðun verður tekin um frekari borun, en hin vatnsæðin er á nokkru meira dýpi og því þyrfti nýja holu til að ná í það vatn.