Spilar á stórtónleikum í Noregi

Robert Plant, Annie Lennox, Nelson Mandela og Gulli Briem saman við ægifagra náttúru Norður-Noregs. Útkoman getur ekki orðið annað en stórfengleg. Mestu tónleikar í sögu Noregs verða haldnir í kvöld með þátttöku íslensku hljómsveitarinnar Earth Affair. Hljómurinn var taktfastur í gamla Valsheimilinu við Hlíðarenda þar sem hljómsveitin æfði sig fyrir tónleikana. Gunnlaugur Briem segir sveitina í raun eins manns band með mörgum aðstoðarmönnum en hann sé mikil félagsvera og vilji hafa sem flesta af vinum og samstarfsfélögum með sér. Tónleikarnir eru haldnir til að vekja athygli á útbreiðslu alnæmis um heimsbyggðina. Nafn tónleikanna, 46664, er fanganúmer Nelsons Mandela, en honum var haldið föngnum í 18 ár á Robben-eyju í Suður-Afríku. Það verða engin smá númer sem koma fram á tónleikunum. Peter Gabriel, Annie Lennox, Robert Plant ásamt fjölda annarra tónlistarmanna. Einn þeirra sem Gunnlaugur kallaði til spilamennsku er Jarleth Henderson, flautu- og pípuleikari frá Norður-Írlandi. Hann leikur á blásturshljóðfæri sem mjög erfitt er að leika á. Henderson segir það líklega eitt það erfiðasta að leika á í heiminu en það hafi verið fullyrt í blaði einu að það tæki um tvo áratugi að læra að leika á það. Gunnlaugur segir að Earth Affair hafi verið boðið að leika á tónleikunum í Noregi í kjölfar þess að hann hafi gefið út plötu í fyrra en henn hafi verið dreift víða. Gunnlaugur hefur mikinn áhuga á hjálparstarfi og segir að honum líði vel að geta notað tónlistina sem einhvers konar tæki til að gera eitthvað gott en ekki bara spila fyrir sjálfan sig eða aðra. Þarna gefist bæði tækifæri til að hjálpa og kynna tónlistina. Tónleikarnir hófust í dag og standa langt fram eftir kvöldi. Þeim er sjónvarpað víða þannig að milljónir manna munu fylgjast með hinni íslensku hljómsveit Earth Affair í kvöld.