Frosnu tærnar tilnefndar

Skáldsagan Frosnu tærnar eftir Sigrúnu Eldjárn hefur verið tilnefnd af hálfu Íslands til Barna- og unglingabókaverðlauna Vestnorræna ráðsins árið 2006.

Íslenska dómnefndin segir meðal annars í rökstuðningi sínum: Þetta er viðburðaríkt og heillandi ævintýri með alvarlegum undirtóni, þar sem nútíminn með tæki sín og tól hittir álfa og dverga og talandi hrafna. Systkinin Stína og Jonni, og Skafti vinur þeirra, kljást hér við brjálaða vísindakonu sem ætlar að skapa nýjar verur til að nota í hernaði.

Enn fremur segir dómnefndin að Sigrún sé einn afkastamesti og vinsælasti barnabókahöfundur landsins, auk þess sem hún er einstakur myndlistarmaður. Hún hefur sérstakt lag á að ná til barna með hröðum, viðburðaríkum sögum. Stíll hennar er knappur og fyndinn, hún kemur sér beint að efninu og kippir lesendum vafningalaust inn í atburðarásina.

Af hálfu Grænlands er tilnefnd til verðlaunanna barnabókin Jólasveinninn og litlu sveinarnir eftir Grethe Guldager sem Nuka Godfredsen hefur myndskreytt.

Þá er tilnefnd af hálfu Færeyja bókin Hundur, köttur og mús eftir Bárð Óskarsson.

Íslensku dómnefndina skipa bókmenntafræðingarnir Silja Aðalsteinsdóttir, sem er formaður, Ármann Jakobsson og Anna Heiða Pálsdóttir.