Ríflega 400 ættleiðingar á árunum 1996-2004

411 ættleiðingar voru hér á landi á tímabilinu 1996 til 2004 eftir því sem fram kemur í nýjum tölum frá Hagstofu Íslands. Í 174 tilvikum var um að ræða stjúpættleiðingu en frumættleiðingar voru 237. Frumættleiddir Íslendingar voru 57 en frumættleiðingar frá útlöndum 180.

Undanfarin þrjú ár hafa langflest ættleidd börn komið frá Kína, 46 stúlkur og einn drengur en ef litið er til áranna 1996-2004 hafa börn frá Indlandi verið flest. Þaðan hafa á þessu tímabili komið 60 stúlkur og 32 drengir. Athygli vekur að hér á landi eru konur fleiri en karlar í hópi stjúpættleiddra. Alls voru stjúpættleiddar konur 122 en karlar einungis 52.