Kolkrabbi rekur öldung úr paradís

"Það er smekklaust og siðlaust að ætla sínum eigin börnum bústaði á landi sem önnur fjölskylda hefur ræktað í yfir 40 ár," segir Margrét Blöndal, dóttir Tryggva Blöndal, níræðs sumabústaðareiganda, sem nú hefur fengið bréf frá Einari Sveinssyni, stjórnarformanni Íslandsbanka, þess efnis að fjölskyldan eigi að hypja sig burt frá Nesjavöllum. Fjölskylda Einars Sveinssonar seldi Orkuveitunni land á Nesjavöllum fyrir 20 árum. Fjölskyldan, sem gjarnan hefur verið skilgreind sem höfðuarmur Kolkrabbans svokallaða, hefur sumarbústaði sína enn á landinu. Hún vill nú fá svæði gamalla leiguliða undir bústaði afkomenda sinna. Einar sagði Tryggva Blöndal upp leigu á landinu sem hann seldi. Tryggvi og fjölskylda hans hafa sumarbústað á landinu og stunda þar skógrækt. Hjörleifur Kvaran, lögmaður Orkuveitunnar, sem á landið, segir fyrirtækið ekki skipta sér af deilum leiguliða á landinu. Einar Sveinsson segist ekki vilja tjá sig um málið sem ítarlega er fjallað um í DV í dag.