Ávísanirnar hugsanlega greiddar út

Hjá VR er til athugunar að endurskoða orlofsávísanafyrirkomulagið á næsta ári, jafnvel með það í huga að greiða upphæðina út. Ekkert er þó ákveðið enn þá enda hefur ýmislegt þarna áhrif, til dæmis skattar. "Þetta er stór spurning og það getur vel verið að þetta þróist meira í það form. Það eru hugmyndir um breytingar á næsta ári svo að hugsanlega mun þetta breytast," segir Gunnar Páll Pálsson, formaður VR. Hann útskýrir að í þessu sambandi séu vangaveltur um að breyta "framsetningu á félaginu", til dæmis "að safna öllum þessum styrkjum frekar upp í séreignasparnað sem er þá bundinn en menn geta leyst út við ákveðnar aðstæður." Orlofsávísunin nemur 5.000 krónum á hvern fullgildan félagsmann og 7.500 krónum hafi viðkomandi ekki notað ávísunina sína í fyrra. Upphæðin stendur síðan í stað sé ávísunin ekki notuð. Gamla ávísunin fellur úr gildi og er ný send á hverju ári.