Yfir þrjátíu dalir í símaskránni

Fjöldi landsmanna er kenndur við dali af ýmsu tagi og er það líkast til algengasta ending íslenskra ættarnafna. Lausleg athugun leiðir í ljós að Blöndal nafnið sé algengast og skipta þeir hundruðum sem það bera. Nóg er að líta til svokallaðs þjóðþekkts fólks til að sjá hve algengt Blöndals nafnið er. Koma þar þingmennirnir Halldór og Pétur upp í hugann, tónlistarsystkinin Magga Stína og Sölvi og fjölmiðlafólkið Auðunn og Margrét. Bryndal, Fossádal og Steindal eru svo á hinum enda kortsins, örfáir bera þessi nöfn. Einstaka Íslendingur ber svo bara Dal og er þar rithöfundurinn Gunnar hvað þekktastur. Ættarnöfn eru annars fátíð hér á landi, lang flestir Íslendingar kenna sig við föður sinn. Fyrir um tvö hundruð árum fór að bera verulega á upptöku ættarnafna og komst í raun í tísku. Fór það fyrir brjóstið á mörgum og meðal annars var reynt að hindra ættarnafnaæðið með lögum. Í dag er heimilt að taka upp ættarnafn að því gefnu að hefð sér fyrir í landinu. Upptaka nýrra ættarnafna er á hinn bóginn ólögmæt. Meðal dala í nöfnum fólks: Arndal Árdal Barðdal Bergdal Blöndal Breiðdal Bryndal Eydal Fossádal Fossdal Geirdal Gröndal Hafdal Haukdal Heiðdal Hraundal Hvanndal Kaldal Laxdal Laufdal Laugdal Líndal Mýrdal Nordal Reykdal Reyndal Skjóldal Snædal Stardal Steindal Vatnsdal