Sárfættir en sáttir

Þeir voru sárfættir en sáttir, tvímenningarnir sem hafa gengið hringveginn undir kjörorðinu „Haltur leiðir blindan“ þegar síðustu kílómetrarnir voru farnir í dag. Fréttastofan hitti þá Bjarka og Guðbrand við Leirvogsá í dag þar sem þónokkur fjöldi fólks hafði slegist í för með þeim síðustu kílómetrana. Þeir hófu ferðalagið þann 20. júní og hafa gengið um 24 kílómetra að meðaltali dag hvern. Eitt af því sem gerir þá Bjarka og Guðbrand sérstaka er að Bjarki er hreyfihamlaður og Guðbrandur nær blindur. Þeir hafa ekki látið það trufla sig mikið en aðaltilgangur ferðalagsins var að vekja athygli á málefnum fatlaðra barna og barna sem eiga við erfið og langvarandi veikindi að stríða. Þeir hafa lagt leið sína á staði þar sem börn með sérþarfir dvelja, vakið athygli á aðgengi og öryggi barna á ferðamannastöðum og rætt við fólk á förnum vegi. Sá fjöldi fólks sem þeir hafa kynnst á leiðinni og það að málefnin sem þeir standi fyrir hafi komist til skila finnst þeim félögum standa upp úr. Þótt þeir hafi nú lagt 1098 kílómetra að baki þá verður ekki lagst með fætur upp í loft. Bjarki ætlar að gefa út barnabók og Guðbrandur, sem er nuddari, kennari og bóndi, leggst á kaf í vinnu því hann segir verkefni ekkert hafa horfið þótt hann hafi „stungið af“. Aðspurðir hvort þeir væru orðnir sárfættir játti Bjarki því en bætti við: „No pain, no gain.“