Leikarar vilja riftun

Nokkrir íslenskir aukaleikarar í kvikmynd Clints Eastwoods vilja rifta samningi sínum vegna leiks í myndinni. Leikararnir hafa leitað aðstoðar Verslunarmannafélags Suðurnesja. Um 550 aukaleikarar taka þátt í kvikmyndinni en tökur á myndinni hefjast í lok næstu viku. Í samningum sem aukaleikararnir hafa skrifað undir er þeim gert að bera ábyrgð á leikmunum og þurfa að greiða tvær milljónir króna ef þeir tapa þessum munum. Þeir starfa að myndinni sem verktakar og fá fimm þúsund krónur fyrir hvern tökudag, en þeir eru ekki tryggðir. Nokkrir leikaranna hafa ákveðið að rifta samningum við Eskimo vegna umfjöllunar fjölmiðla síðustu daga. Stéttarfélög á Suðurnesjum hafa ákveðið að aðstoða þá leikara sem vilja rifta samningunum. Guðbrandur Einarsson, formaður Verslunarmannafélags Suðurnesja, segir að félagið hafi látið lögfræðinga skoða málið fyrir sig. Guðbrandur segir samninginn ófullkominn. Í honum séu engin ákvæði um laun og allt það sem snúi að tryggingum og veikindum sé út úr öllu korti. Hann býst við að fleiri leiti aðstoðar verslunarmannafélagsins vegna riftunar samninganna.