Segir landlækni fara með rangt mál

Jóhann Tómasson heilsugæslulæknir segir Læknablaðið hafa neitað sér um birtingu á grein í síðasta tölublaði þar sem hann færir frekari sönnur á mál sitt varðandi lækningaleyfi Kára Stefánssonar. Vildi hann þar svara landlækni sem hafði sagt leyfi Kára vera fullt og ótakmarkað.

Í sama tölublaði og greinin átti að birtast er Kári beðinn afsökunar á því að Læknablaðið hafi birt fyrri grein Jóhanns, Nýi sloppur keisarans. Fréttablaðið birtir hér grein Jóhanns.

"Í yfirlýsingu Sigurðar Guðmundssonar, landlæknis, sem birt var í Læknablaðinu, segir að Kári Stefánsson hafi fengið fullt og ótakmarkað lækningaleyfi þann 10. júní 1977 og sérfræðileyfi í taugalækningum þann 14. desember 1984. "Aðrar upplýsingar eru ekki hjá Landlæknisembættinu um leyfisveitingar Kára Stefánssonar. Hann hefur því fullt og ótakmarkað lækningaleyfi."

Framangreind fullyrðing landlæknis er því miður röng. Hið rétta er að Kára Stefánssyni var veitt lækningaleyfi þrátt fyrir að hann væri enn á kandidatsári og ætti að auki ólokinni héraðsskyldu. Þessi undanþága þótti með ólíkindum og olli mikilli gremju, enda gríðarlegir hagsmunir í húfi sem Kára hlotnuðust einum manna. Þann 1. júlí 1977 gekk í gildi strangt inntökupróf sem hefti för allra skólafélaga Kára til Bandaríkjanna í a.m.k. eitt ár.

Auk þess þurftu menn að fara til London til að taka prófið með tilheyrandi undirbúningi og kostnaði. Skólafélagar Kára gátu því fyrst hafið nám í Bandaríkjunum um mitt ár 1978, ári á eftir Kára Stefánssyni.

Löngu síðar, eða við útkomu bókarinnar "Kári í jötunmóð" árið 1999, kom í ljós að Kári hafði fengið lækningaleyfið út á eið sem hann gaf fyrrverandi landlækni. Er í skjalasafni Landlæknis að finna svohljóðandi skjal, sem Kára hafði verið gert að skrifa og undirrita vegna leyfisveitingarinnar: Reykjavík, 31/5 1977 Hér með heiti ég því að vinna 3ja mánuði í héraði að lokinni námsdvöl í Ameríku.

Kári Stefánsson

Vitundarvottar: Gunn Guðmunds. Ásta Gunnarsdóttir.

Það er því ljóst að lækningaleyfi Kára Stefánssonar var þeim takmörkunum háð að hann þurfti seinna að ljúka héraðskyldunni og það hefur hann ekki enn gert. Bók Guðna Th. Jóhannessonar, eins efnilegasta sagnfræðings landsins, "Kári í jötunmóð", vakti mikla athygli á sínum tíma og mun gera um ókomin ár.

Ofangreind tilvitnun úr bókinni hefur til dæmis margoft verið til umfjöllunar í ræðu og riti. Landlæknir hefur gefið út ritið "Góðir starfshættir lækna". Það er væntanlega öllum læknum kunnugt en rétt er engu að síður að hvetja menn að kynna sér það vel. Landlæknir hefur margsinnis bent á nauðsyn vísinda og þekkingar. Hann hefur beitt sér af alefli fyrir gerð miðlægs gagnagrunns á heilbrigðissviði sem sérstaks tækis til að afla þekkingar. Það vekur því athygli að hann skuli bregða fyrir sig þekkingar- og heimildaleysi til að taka að sér lykilhlutverk í hringleik sem sanna á að undirritaður læknir sé ómerkingur. Hvað finnst honum þá um eiða Kára Stefánssonar?" spyr Jóhann Tómasson læknir.