Verulega dregur úr vaxtabyrði ríkisins

"Það liggur fyrir að staða ríkissjóðs er sterk. Tekjuafgangur er 19,5 milljarðar króna," sagði Magnús Stefánsson, formaður fjárlaganefndar, við afgreiðslu fjárlagafrumvarpsins sem varð að lögum frá Alþingi í gær.

"Þetta eru nærri tvö prósent af landsframleiðslu sem er meiri afgangur en flestar Evrópuþjóðir geta státað af um þessar mundir. Það verður haldið áfram að greiða niður skuldir ríkissjóðs og má gera ráð fyrir að þær muni nema 10 prósentum af landsframleiðslu í árslok 2006 sem er gríðarleg breyting frá því sem var fyrir áratug þegar þetta hlutfall var nálægt því 50 prósent."

Magnús bætti við að vaxtagjöld ríkissjóðs væru nú sjöundi stærsti útgjaldaliður ríkissjóðs en hefði verið annar til þriðji stærsti útgjaldaliðurinn fyrir um áratug. Magnús sagði jafnframt að útgjöld til velferðarmála væru aukin þvert á það sem stjórnarandstaðan héldi fram.

Framlög til mennta- og menningarmála væru meira en 12 prósentum hærri en árið 2005 eða sem næmi 4,4 milljörðum króna. "Hér er ellefta árið í röð verið að létta byrðum af þeim tekjuhæstu og leggja þær á hina tekjulægstu og auka þannig misskiptinguna í íslensku samfélagi," sagði Helgi Hjörvar, þingmaður Samfylkingarinnar.

"Aðaltekjur ríkissjóðs eru að verða skattar á viðskiptahallann og þensluna. Það eru ekki traustar tekjur," sagði Jón Bjarnason, vinstri grænum, í umræðunni og bætti við að hátæknifyrirtæki og aðrar útflutningsgreinar blæddu fyrir stefnu stjórnvalda.

Breytingatillögur stjórnarandstöðunnar voru allar felldar. Má þar nefna, tillögu um lækkun matarskatts og hækkun persónuafsláttar, aukin framlög til háskóla og framhaldsskólanna. Felld var tillaga um að horfið yrði frá einkarekstri listdanskennslu. Skert framlög til Mannréttindaskrifstofunnar voru harðlega gagnrýnd og hét stjórnarandstaðan því að fylgja því máli betur eftir.

Tillaga um 600 milljóna króna framlag til efnda á samningi við Öryrkjabandalagið var felld. Tillaga um 500 milljóna króna framlag til að endurreisa fjárhag Byggðastofnunar var einnig felld.

"Þetta er gott frumvarp og hefur batnað," sagði Pétur H. Blöndal þingmaður Sjáflstæðisflokksins.