Kraumar í Tilraunaeldhúsinu

"Við erum svolítið að segja í þessari sýningu að list er skemmtileg. Hún er ekki flókin gáta til þess að leysa og maður á að finna til og finna fyrir henni," segir Kristín Björk Kristjánsdóttir, öðru nafni Kira Kira, sem nú hefur starfrækt Tilraunaeldhúsið í sjö ár ásamt félögum sínum Jóhanni Jóhannssyni og Hilmari Jenssyni. Þessar vikurnar stendur yfir sýning Tilraunaeldhússins í Nýlistasafninu.

Á sýningartímabilinu slær Tilraunaeldhúsið upp röð ellefu viðburða og verður sá fyrsti á dagskrá með tveimur uppákomum. Fyrst leggja í púkkið þeir Dagur Kári Pétursson, Valgeir Sigurðsson og Auxpan. "Þeir ætla að sjóða saman í stuttan performans sem verður eflaust að mestu spunninn af fingrum fram. Okkur kitlaði eitthvað í eldhúsbrýnið að sjá þessa heiðursmenn kitla hver annan."

Síðan tekur við hljómsveitin Rass sem fékk til liðs við sig listamenn úr ýmsum áttum, þar á meðal Daníel Bjarnason myndlistarmann. "Okkur flaug í hug að Rass og Daníel myndu gera eitthvað skemmtilegt saman. Rassalingarnir fóru vel á flug með okkur og út úr því kom sú hugmynd að fá Skólahljómsveit Vesturbæjar með í dæmið. Þetta er sveit fimmtán tólf ára krakka sem Lárus Grímsson stjórnar. Sömuleiðis véluðu þeir Birgi Andrésson inn í brasið."

Viðburðir Tilraunaeldhússins verða á þriðjudögum, fimmtudögum og laugardögum og þar verða fornar dyggðir Tilraunaeldhússins vaktar til lífsins á ný með því að kveikja elda milli ólíkra listamanna. "Við hlökkum rosalega til að sjá öll þessi verkefni seitla og sjóða," segir Kristín Björk.