Friður tryggður á vinnumarkaðnum

"Það er fjarri lagi að þetta sé einhver óska­samningur og ekki hægt að túlka þetta sem einhvern sigur af okkar hálfu," segir Hannes G. Sigurðsson, aðstoðarframkvæmdastjóri Samtaka atvinnulífsins, eftir að samkomulag náðist við Alþýðusamband Íslands um breytingar á gildandi kjarasamningum. Hannes telur samninginn vera kostnaðarsaman fyrir atvinnu­lífið þar sem um 0,65 prósenta varanlega launahækkun sé að ræða. "Auðvitað erum við þó sátt við að samningar skuli halda," segir Hannes.

"Það er langur aðdragandi að þessu samkomulagi," segir Grétar Þorsteinsson, forseti Alþýðusambands Íslands. Grétar segir allt það sem fram hafi komið í yfirlýsingu ríkisstjórnar­innar í gær hafa mikil áhrif. "Stærsta málið er þó væntanlega framlag ríkisstjórnarinnar til örorkumála, enda hefur örorkubyrðin verið að sliga marga af okkar lífeyrissjóðum þannig að komið hefur til skerðingar á lífeyrisréttindum," segir Grétar. Þessi aðkoma ríkisins er í áföngum á þriggja ára tímabili og hefst árið 2007. "Þar er stigið myndarlegt skref því að óbreyttu hefðu mun fleiri lífeyrissjóðir orðið að skerða sínar greiðslur," segir Grétar. Hann telur að nú hafi verið komið í veg fyrir þá neikvæðu þróun á næstu árum. Aðstoð ríkisins við lífeyrissjóðina nemur 0,25 prósentum af tryggingargjaldi en á núvirði nemur það um 1,5 milljörðum.

"Nú sjáum við einnig hækkun og tekjutengingu á atvinnuleysisbótum sem kemur til með löggjöf eftir áramótin," segir Grétar. Hann telur það munu verða mestu breytingar á atvinnuleysisbótalögjöfinni frá upphafi.

"Við höfum einnig verið í afar erfiðum málum með starfsmannaleigurnar, sem hafa haft rangt við svo ekki sé fastar að orði kveðið. Þess vegna er mjög mikilvægt fyrir samfélagið allt að hægt sé að koma betur böndum á þess háttar starfsemi." Í aðkomu ríkisstjórnarinnar felst frumvarp til laga um starfsmannaleigur sem taka skulu gildi fyrir áramót.