Forysta er hópstarf

Liðlega tólf þúsund eða um 60 prósent af um tuttugu þúsund flokksmönnum greiddu atkvæði í formannskjöri Samfylkingarinnar. Ingibjörg Sólrún Gísladóttir hlaut 7.997 gildra atkvæða en Össur Skarphéðinsson 3.970. Ingibjörg Sólrún hlaut því tvö af hverjum þremur gildra atkvæða. Össur Skarphéðinsson fráfarandi formaður Samfylkingarinnar sagði í ávarpi eftir að úrslit voru kynnt á hádegi í gær að sigurinn væri sterkur fyrir Samfylkinguna og sterkur fyrir Ingibjörgu Sólrúnu. "Tækifæri Samfylkingarinnar felst ekki í því hvort okkar Össurar leiðir flokkinn í næstu kosningum," sagði Ingibjörg Sólrún í ávarpi sínu. "Forysta er hópstarf en ekki einstaklingsframtak. Formaður er fremstur þeirra jafningja en hann kæmist hvorki lönd né strönd ef hann hefði ekki góðan málstað og gott fólk til að vinna með sér," sagði Ingibjörg Sólrún jafnframt og bar lof á drenglyndi Össurar og stuðningsmenn hans. "Þessi kosningabarátta er Össuri og hans liðsmönnum til sóma. Ég vil þakka honum fyrir drengilega baráttu og segi honum um leið, að ég hlakka til að vinna með honum að málefnum Samfylkingarinnar um ókomin ár," sagði Ingibjörg Sólrún ennfremur í ávarpi sínu. Össur þakkaði hlý orð keppinautarins í sínu ávarpi og hét því að halda lengi áfram í stjórnmálum enn enda þætti honum þau bæði skemmtileg og göfgandi. Ingibjörg sagði í samtali við Fréttablaðið að hún teldi að landsfundurinn nú væri tímamótafundur. "Fundurinn er gríðarlega fjölmennur og málefnalega vel undirbúinn. Hér er mikil hugmyndaleg deigla og forystan er ný. Flokkurinn er nú þeirrar stærðar og styrkur hans það mikill að hann er til alls líklegur í næstu þingkosningum." Mikil endurnýjun varð í forystu Samfylkingarinnar í gær. Ágúst Ólafur Ágústsson var kjörinn varaformaður og sigraði Lúðvík Bergvinsson með nokkrum yfirburðum. Heimir Már Pétursson upplýsingafulltrúi Flugmálastjórnar bauð sig fram til varaformanns í gær en hlaut aðeins fáein atkvæði.