Hækka skólagjöldin um 500%?

Háskólinn í Reykjavík og Tækniháskóli Íslands verða sameinaðir næsta haust og verða þar með að næststærsta háskóla landsins, með um 2500 nemendur. Miðað við núverandi skólagjöld má reikna með að skólagjöld Tækniskólanemenda hækki um rúmlega 500 prósent. Stofnun einkahlutafélags sem tekur yfir starfsemi Háskólans í Reykjavík og Tækniháskóla Íslands var kynnt í dag. Hlutafé hins nýja félags er 300 milljónir króna. Verslunarráð Íslands leggur til 270 milljonir, Samtök iðnaðarins leggja til tuttugu milljónir og Samtök atvinnulífsins tíu milljónir. Jón Karl Helgason, stjórnarformaður Verslunarráðs Íslands, segir að með sameiningunni verði t.a.m. hægt að taka inn verkfræðimenntun og kennaramenntun og stækka skólann og efla. Þannig sé hann bjartsýnn á að þetta muni efla menntun í landinu til langframa. Þorgerður Katrín Gunnarsdóttir menntamálaráðherra segir að ríkið muni greiða nemendaígildi og rannsóknarframlag til skólans, líkt og það hafi gert við alla háskóla landsins, og að þessi samruni dragi á engan hátt úr framlagi ríkisins til háskólanáms. Núverandi nemendur Tækniháskólans greiða áfram skólagjöld á núverandi forsendum skólans en ljóst má vera að skólagjöld nýrra nemenda hækkar að sögn menntamálaráðherra. Innritunargjald í Tækniháskólann er nú 32 þúsund krónur á ári en í Háskólann í Reykjavík tæpar 200 þúsund krónur. Sé miðað við þetta mun innritunargjald í fyrrnefnda skólann hækka um rúm 500 prósent. Jón Karl segir tímabært að færa umræðu um skólagjöld upp á annað plan. Það sé í sjálfu sér ekkert óeðlilegt að menn fjárfesti í sinni menntun og reynslan af skólagjöldunum við HR sé góð. Báðir rektorar skólanna, Guðfinna S. Bjarnadóttir hjá HR og Stefanía K. Karlsdóttir hjá THÍ, segjast himinlifandi með samrunann. Þó er ljóst að annar hvor þarf að víkja en báðir hafa áhuga á að verða rektor hins nýja skóla.