Eigum erfiðan leik fyrir höndum

Henrik Larsson, leikmaður sænska landsliðsins í knattspyrnu, reiknar með mikilli mótspyrnu af hálfu Íslendinga í leiknum í kvöld. Ef rýnt er í viðureignir þessara tveggja liða við lið Möltu, ættu Svíarnir að vinna leikinn frekar auðveldlega. Þeir burstuðu Möltubúa, 7-0 en Ísland gerði 0-0 jafntefli. Larsson fer varlega í að einfalda hlutina á þennan hátt. "Þetta er ekki svo auðvelt," segir Larsson. "Ef við gætum reiknað dæmið þannig, þá væri það þægilegt. En þannig virkar þetta ekki. Við áttum stórleik gegn Möltu og þeir settu leik sinn öðruvísi upp gegn okkur heldur en Íslendingum, og gátu því veitt þeim meiri mótspyrnu en okkur." Að sögn Larssons mætir sænska liðið til leiks með það fyrir augum að Íslendingar séu verðugir andstæðingar. "Við vitum að við eigum erfiðan leik fyrir höndum. Meðal andstæðinga okkar eru atvinnumenn úr deildum í Evrópu, t.a.m. Englandi og Þýskalandi og þeir eiga að auki marga leikreynda leikmenn. Það er pressa á þeim og þeir munu reyna að gera okkur leikinn eins erfiðan og hægt er." Larsson sagðist þekkja vel til Eiðs Smára Guðjohnsen. "Hann þekkja náttúrulega allir og svo er náunginn hjá Charlton líka í liðinu. Maður þekkir andlitin betur en nöfnin þegar maður sér þá spila í stóru deildunum og Íslendingar virðast ekki vera á flæðiskeri staddir með atvinnumenn." Larsson fullyrðir að persónuleg frammistaða hans skipti ekki máli heldur verði liðið að standa sig vel í heild sinni. "Það hjálpar til að við Zlatan og Mackan erum farnir að þekkja hvor annan nokkuð vel og lesum hvor annan betur með hverjum leiknum. Svo verðum við að sjá til hvaða leikaðferð Íslendingar beita gegn okkur og gera viðeigandi ráðstafanir við því." Pilturinn segir Íslendingana vera vel á sig komna og leikurinn gæti því orðið í harkalegri kantinum. "Þeir eru sterkir og duglegir og eiga þar að auki mjög góða áhorfendur sem standa vel við bakið á þeim. Ef til kastanna kemur verðum við að vera fastir fyrir og verði einhver harka í leiknum þá þýðir ekkert að vera að væla yfir því. En það má alltaf búast við því þegar svona lið mætast að einhver harka verði fyrir hendi og þá er bara að taka á því. Taktíst séð verðum við að vera tilbúnir og þess er krafist af okkur að við getum spilað hraðan bolta og að það bitni ekki á taktísku hliðinni," sagði Henrik Larsson. smari@frettabladid.is