250 þúsund manns á götum Aþenu

Milljónir Grikkja vöknuðu upp í morgun með timburmenn eftir eftir að hafa fagnað sigri á Evrópumeistaramótinu í Portúgal með sigri á heimamönnum 1-0. Talið er að í miðborg Aþenu hafi um 250 þúsund manns þust út á göturnar til að halda upp á sigurinn. Í morgun var tilkynnt að Theodoros Zagorakis, fyrirliði gríska landsliðsins, var valinn besti leikmaður EM 2004. Átta manna nefnd á vegum Knattspyrnusambands Evrópu sá um kjörið og tók m.a. mið af kosningu á heimasíðu sambandsins. Gerhard Houllier, fyrrverandi stjóri Liverpool, sem á sæti í nefndinni, sagði að Zagorakis hefði sýnt leiðtogahæfileika, tæknilega hæfileika og mikla vinnusemi í gegnum allt mótið. Zagorakis var einnig valinn besti leikmaður úrslitaleiksins. Þá var stjörnulið mótsins valið en í því eru 23 leikmenn, þar á meðal fimm úr Evrópumeistaraliði Grikklands. Hetja Grikkja, Angelos Haristeas, sem skoraði sigurmarkið, er nú kallaður Engill Grikklands í heimalandi sínu. Haristeas sagði eftir leikinn að Grikkland verðskuldaði Evrópumeistaratitlinn en Haristeas hefur ekki átt fast sæti í liði Werder Bremen í Þýskalandi. Christiano Ronaldo sagði að Portúgal hefði verið besta liðið á EM en óskaði Grikkjum til hamingju með sigurinn og sagði að þeir hefðu nýtt sín marktækifæri vel. Sigur Grikklands í EM eru ein óvæntustu úrslit í sögu stórmóta í knattspyrnu. "Við höfum endurskrifað knattspyrnusöguna" sagði Þjóðverjinn Ottó Rehhagel, landsliðsþjálfari Grikkja sem stóð til að reka fyrir ári síðan. Rehhagel hefur verið gagnrýndur harkalega fyrir að láta Grikkland spila gamaldags varnarfótbolta þar sem taktíkin ,maður á mann, er í fyrirrúmi. Rehhagel kallar sjálfur leikaðferð sína trójuhestinn, meira í gamni en alvöru. Otto Rehhagel neitaði að tjá sig á blaðamannafundi eftir leikinn um vangaveltur þess efnis að hann myndi hætta með gríska landsliðið og taka við því þýska og stýra því á heimsmeistaramótinu í Þýskalandi 2006. Rehhagel á enn tvö ár eftir af samningi sínum við gríska knattspyrnusambandið. Portúgalski landsliðsmaðurinn Deco, sem reyndar er fæddur í Brasilíu, er á leið til Barcelona frá Porto fyrir einn milljarð króna að sögn forseta Barcelona Joan Laporta. Einungis á eftir að ganga frá smáatriðum varðandi samninginn.