Verð aldrei hækkað jafn hratt

Fasteignaverð hefur aldrei hækkað jafnhratt á höfuðborgarsvæðinu og undanfarna þrjá mánuði. Verðið hefði hins vegar lækkað eða staðið í stað ef íbúðalán bankanna hefðu ekki komið til, að mati greiningardeildar KB banka. Vísitala fasteignaverðs á höfuðborgarsvæðinu hækkaði um 3,8% í nóvember. Á undanförnum þrem mánuðum hefur fasteignaverð á höfuðborgarsvæðinu hækkað um tæp níu prósent og hefur aldrei hækkað jafnmikið á svo skömmum tíma. Á árunum 1999 til 2000, þegar mikil uppsveifla var í fasteignaverði, hækkaði það mest um 7,2 prósent á þriggja mánaða tímabili. Ef ekki hefðu komið til íbúðalán bankanna hefði fasteignaverð hins vegar staðið í stað eða jafnvel lækkað á þessu þriggja mánaða tímabili nú. Tólf mánaða hækkun fasteignaverðs á höfuðborgarsvæðinu á milli nóvembermánaða hefur þó ekki náð sömu hæðum og á fyrrgreindu tímabili á árunum 1999 til 2000, þegar fasteignaverð hækkaði um heil 24 prósent á tólf mánuðum. Athyglisvert er þó að árshækkun á sérbýli nú er rúm 22 prósent, sem er meiri hækkun en nokkru sinni áður. Þetta kemur, að mati greingardeildar KB banka, til vegna þess að greiðslugeta hefur aukist um nær þriðjung með tilkomu lægri vaxta og því auðveldara að fjárfesta í dýrari íbúð. Þannig eru afborganir af 19 milljón króna íbúð nú svipaðar og af 15 milljón króna íbúð áður en bankarnir hófu innreið sína á fasteignamarkaðinn. Þetta er í takt við þá þróun sem spáð hafði verið, enda leiðir lækkun vaxta og greiðari aðgangur að fjármagni til þess að stærri og betri eignir verði eftirsóttari, en að sama skapi sé allsendis óvíst að smærri íbúðir, kjallaraíbúðir og íbúðir á síður eftirsóttum svæðum haldi áfram að hækka mikið lengur.