Fuglaflensan vofir yfir

Fuglaflensufaraldur vofir yfir jarðarbúum. Óttast er að ekkert bóluefni verði til þegar inflúensan dynur yfir. Ef veikin hefði svipuð áhrif hér og landi og spánska veikin hafði í byrjun síðustu aldar létust um þrjú þúsund Íslendingar og um hundrað þúsund veiktust. Alþjóðaheilbrigðisstofnunin hefur varað við því að fuglaflensa sem geisað hefur í Asíu geti leitt til mannskæðs inflúensufaraldurs sem gæti herjað á allt að þriðjung jarðarbúa. Stofnunin telur að á milli 2-7 milljónir manna geti látist af völdum flensunnar og allt að þriðjungur jarðarbúa veikst. Óttast er að þetta gæti orðið svipaður faraldur og spánska veikin sem geisaði í heiminum árið 1918 og varð um tuttugu milljónum manna að aldurtila. Tíu þúsund af um 15 þúsund Reykvíkingum veiktust af inflúensunni á mjög skömmum tíma. Talið er að ef fuglaflensan berst manna á milli geti hún orðið að heimsfaraldri á skömmum tíma. Haraldur Briem sóttvarnalæknir segir marga telja að tími sé kominn á fuglaflensuna núna hér á landi. Hann líkir henni við spánsku veikina að því leytinu til að flensan hefur slæm áhrif á ungt og frískt fólk með hárri dánartíðni. Að sögn Haraldar þýða yfirfærðar afleiðingar spánsku veikinnar á nútímasamfélagið á suðvesturhorni landsins að u.þ.b. hundrað þúsund manns myndu veikjast og um þrjú þúsund deyja. Þar af væri helmingurinn á aldrinum 20-40 ára. Heilbrigðisyfirvöld hér á landi taka mið af viðbragðsstigum vegna influensufaraldra sem Alþjóðaheilbrigðisstofnunin gefur út, og ef ástæða þykir til er gripið til sóttvarnaraðgerða á borð við einangrun og sóttkví. Einungis takmarkað magn er til af inflúensulyfjum í heiminum og segir Haraldur að menn óttist að bóluefni verði ekki til þegar fuglaflensan dynur yfir. Hann líkir ástandinu við biðina eftir Suðurlandsskjálftanum stóra eða Kötlugosi - það er ekki spurning um hvort þetta ríður yfir heldur hvenær.