Eigum að leyfa fjölbreytni

Tvær tólf ára stúlkur voru í síðustu viku reknar úr frönskum skóla fyrir að neita að taka ofan höfuðslæðu. Ingvill Plesner er sérfræðingur í trúfrelsismálum og mannréttindum og er stödd hér á landi við rannsóknarstörf á vegum Háskólans á Akureyri. Hún hefur sérstaklega skoðað nýleg lög í Frakklandi sem banna nemendum að ganga með áberandi trúartákn. Hún segir að ef takmarka eigi þennan rétt verði afar góð ástæða að búa að baki í lýðræðislegu þjóðfélagi, til dæmis með hliðsjón af almannareglum. Í þessu tilviki eigi slíkt stundum við. Þó sé bannið ekki í samræmi við markmið og kröfur um trúfrelsi. Ingvill bendir á að ef tilgangur laganna sé að aðlaga múslima að frönsku samfélagi þá virki þau í raun þveröfugt. Með því að reka börn úr skóla sé verið að dæma þau til félagslegrar einangrunar og af því spretti fleiri vandamál en af klæðaburðinum einum saman. Ingvill segir að ýmsar ástæður geti legið að baki slæðunotkun múslimakvenna; það sé einföldun og ranghugmynd að slæðan sé alltaf tákn um öfgakennda trú og kvennakúgun og hún ráðleggur íslenskum stjórnvöldum að sýna umburðarlyndi í þessum málum. Hún segir að þegar komi að reglum þurfi jafnræði að ríkja. Reglur verði að gilda um alla. Íslendingar verði að velta því fyrir sér hvort þeir vilji leggja áherslu eða fjölbreytni eða einsleitni. Hvort opinberar stofnanir eins og skólar séu nokkurn vegin lausir við trúarleg tákn. Hún segist sjálf á þeirri skoðun að best sé að börn læri að kynnast sem mestri fjölbreytni og trúarleg tákn séu leyfð hér á landi.