EasyJet flýgur ekki til Íslands

Flugleiðir keyptu síðdegis 8,4 prósenta hlut í breska lággjaldaflugfélaginu easyJet. Flugleiðamenn eiga ekki von á að easyJet hefji flug hingað til lands þrátt fyrir þetta. Breskir fjölmiðlar fóru hamförum í morgun þegar fréttist að því að enn á ný væri hópur íslenskra fjárfesta kominn á kreik á breskum fjármálamarkaði og að þetta sinn væri skotmarkið eitt þekktasta vörumerki evrópska flugbransans: easyJet. Í upphafi var talið líklegt að hið nýstofnaða fyrirtæki Avion Group væri þarna á ferð og sumstaðar í breskum fjölmiðlunum var Iceland Express nefnt til sögunnar. Fljótlega varð þó ljóst að Flugleiðir, móðurfélag Icelandair, væru þarna á ferð. Verð hlutabréfa í easyJet eru í sögulegu lágmarki um þessar mundir. Verðmæti hlutabréfa hefur fallið um 2/3 frá áramótum en hefur verið nokkuð stöðugt undanfarnar vikur. Það rauk hins vegar upp um tuttugu prósent í dag, áttatíu og sex milljónir hlutabréfa voru keyptar og seldar á markaði í Lundúnum - tífalt meira en á venjulegum degi. Hannes Smárason, stjórnarformaður Flugleiða, segir áhugann á easyJet hafa verið til staðar um hríð og Flugleiðir því fylgst með breska flugfélaginu nokkuð vel á þessu ári. Sjálf viðskiptin gerðust hins vegar mjög hratt að sögn Hannesar. Spurður hvort þetta sé fyrsta skrefið af fleirum út fyrir landsteinana segir hann svo geta verið. Hannes neitar því að þetta séu viðbrögð við stofnun Avion Group.  Ekki stendur til að Icelandair verði lággjaldaflugfélag á næstunni og Hannes taldi ekki að breyting yrði á högum íslenskra flugfarþega vegna þessarra kaupa, en alls keyptu Flugleiðir 8,4 prósenta hlut í easyJet. Mikill stærðarmunur er á félögunum. Til að mynda var hagnaður easyJet í fyrra um níu milljarðar króna á síðasta rekstrarári en Flugleiðir högnuðust um 1,1 milljarð. Spurður hvort Davíð sé að gleypa Golíat segir Hannes svo alls ekki vera.