Gunnlaugur nýtur trausts ráðherra

Menntamálaráðherra segist bera fyllsta traust til formanns útvarpsráðs og segist trúa því að hann hafi ekki komið nálægt kaupum Símans í Skjá einum. Ráðherra segir það ekki skarast að formaðurinn gegni einnig trúnaðarstörfum í viðskiptalífinu og komi þannig að slíkum viðskiptum. Fréttastofan hefur traustar heimildir fyrir því að Gunnlaugur Sævar Gunnlaugsson formaður útvarpsráðs ríkisútvarpsinsins hafi átt virkan þátt í því að fá Símann til að fjárfesta í Skjá einum. Þetta kom fram í frétt Stöðvar í fyrrakvöld. Í sömu frétt var haft eftir menntamálaráðherra að málið yrði skoðað Þorgerður Katrín Gunnarsdóttir segist taka orð Gunnlaugs fullgild og hún muni ekki skipta sér meira af þessu máli. Í DV í dag er því einnig haldið fram að Gunnlaugur Sævar hafi átt fundi með Brynjólfi Bjarnasyni forstjóra Símans og Magnúsi Ragnarssyni framkvæmdastjóra Skjás eins skömmu áður en Síminn keypti fjórðungshlut í Skjá einum og á sýningarrétti á enska boltanum. Magnús staðfestir að hafa átt fundi með Gunnlaugi Sævari, en segir efnið trúnaðarmál. Hann segist aldrei hafa átt fundi með Gunlaugi Sævari Gunnlaugssyni formanni útvarpsráðs, en hafi átt fundi með Gunnlaugi Sævari Gunnlaugssyni stjórnarformanni Tryggingamiðstöðvarinnar um hugsanlega aðkomu þess fyrirtækis að Skjá einum. Þegar þetta var borið undir menntamálaráðherra ítrekaði Þorgerður Katrín traust sitt á Gunnlaugi Sævari og að hún styddi hann áfram sem formann útvarpsráðs. Ráðherra fannst það ekki bjóða upp á vangaveltur og efasemdir að formaður útvarpsráðs gegndi svona mismunandi stöðum sem gætu skarast. Hún segist ekki sjá að þessi störf skarist á nokkurn hátt og Gunnlaugur hafi sinnt starfi sínu sem formaður útvarpsráðs afar vel og hann hafi fullt traust. Gunnlaugur Sævar er líka stjórnarmaður í fjárfestingabankanum Straumi þar sem kaup á hlut í Skjá einum hafa verið til umræðu. Magnús Kristinsson stjórnarmaður sagðist í samtali við Stöð 2 í dag fagna þeirri ákvörðun starfsmanna Straums að hafa eftir athugun ákveðið að fjárfesta ekki í þeim fjórðungshlut sem Síminn keypti í Skjá einum og sýningarrétti á enska boltanum. Magnús segist ekki hafa talið það spennandi viðskipti. Þórður Már Jóhannesson forstjóri Straums sagði það stefnu sína að ræða ekki viðskipti sem ekkert hefði orðið af.