Þeir teygja sig yfir til okkar

Yfir standa viðræður milli Kópavogsbæjar og Reykjavíkur um lausn deilu sem reis þegar borgarráð Reykjavíkur meinaði Kópavogi að leggja kaldavatnsleiðslu frá Vatnsendakrikum yfir land borgarinnar í Heiðmörk. Sigurður Geirdal, bæjarstjóri í Kópavogi, gerir síður ráð fyrir að málið leysist fyrr en Þórólfur Árnason borgarstjóri snýr aftur úr sumarleyfi eftir um hálfan mánuð. "Við ræddum þetta í rólegheitunum rétt áður en hann fór," sagði Sigurður, sem telur deiluna til komna vegna þess að embættismenn hafi farið fullgeyst. "Enn og aftur sýnir sig hve miklu skiptir að þekkja forsögu mála," sagði hann og vísaði til þess að fyrir nokkrum árum hafi Reykjavíkurborg lokað borholum og borgað landeiganda að Vatnsendakrikum bætur eftir að hafa hafið þar framkvæmdir. "Það hefur aldrei verið vafamál að þetta er í Kópavogslandi," segir Sigurður og telur af og frá að með borun eftir vatni í Vatnsendakrikum séu Kópavogsbúar að sækja vatn í eigu borgarinnar á vatnssviði Gvendarbrunna. "Það er öfugt. Gvendarbrunnar hafa alltaf verið á gráu svæði. Þeir eru alltaf að teygja sig yfir til okkar," segir hann. Í áliti borgarlögmanns til borgarráðs segir að borsvæðið umdeilda í Vatnsendakrikum tilheyri þeim 689 hekturum sem borgin tók eignarnámi úr landi Vatnsenda árið 1949. "Landið hafði verið í eigu bóndans á Vatnsenda og fékk hann greiddar bætur vegna þessa," segir í álitinu. Bent er á að bæjarfélögin greini á um staðsetningu tveggja spilda sem ekki hafi verið girtar af í kjölfarið. Borgarlögmaður lagði því til að beðið yrði úrskurðar Óbyggðanefndar þar til réttarágreiningi um eignarhald og lögsögumörk á svæðinu hefði verið eytt. Jafnframt segir að fari svo að bóndinn í Vatnsenda verði talinn eiga skikann í Vatnsendakrikum séu samt nokkrar líkur á að landið teljist "innan afréttar Seltjarnarneshrepps hins forna og þá innan marka þeirrar lögsögu sem Reykjavíkurborg hefur krafist í þjóðlendumálinu." Þá kemur fram að Vatnsveita Reykjavíkur hafi árið 1991 borað eftir vatni í Vatnsendakrikum, en lögbannsmál bóndans á Vatnsenda verið fellt niður þegar Vatnsveitan lýsti því yfir að hún myndi ekki nýta holurnar í náinni framtíð.