Björgólfur skattakóngur

Björgólfur Guðmundsson, formaður bankaráðs Landsbankans, er skattakóngur Íslands. Honum ber að greiða tæpar 300 milljónir króna í opinber gjöld. Sá sem kemur á eftir Björgólfi í Reykjavík greiðir rúmum 200 milljónum króna minna en hann. 90 þúsund Reykvíkingar greiða tæplega 60 milljarða króna í opinber gjöld samkvæmt álagningarskrá. Í höfuðborginni eru lagðir tæpir 60 milljarðar króna á 90 þúsund framteljendur. Samkvæmt því eru lagðar að meðaltali tæplega 650 þúsund krónur á mann. Í sex sveitarfélögum á höfuðborgarsvæðinu eru meðalálagning hærri. Hún er langhæst á Seltjarnarnesi og í Garðabæ, tæpar 900 þúsund á mann, en síðan koma Grindavík, Bessastaðahreppur, Kópavogur og Mosfellsbær. Loks kemur Reykjavík og þar á eftir Hafnarfjörður. Þeir sem hæst greiða gjöldin eru þó drjúgan spöl frá meðaltalinu. Skattakóngur Reykjavíkur og landsins er Björgólfur Guðmundsson, formaður bankaráðs Landsbankans með tæplega 300 milljóna króna álagninu. Þar á eftir kemur Bogi Pálsson, sem tilheyrir Toyota fjölskyldunni. Hann er langt á eftir Björgóli með rúmar 80 milljónir króna. Þriðji er svo Jón Ásgeir Jóhannesson, forstjóri Baugs. Þá kemur Þórarinn Kristinsson og loks Ingimundur Sveinsson. Í nágrannabyggðalögum Reykjavíkur er Árný Enoksdóttir, ekkja útgerðarmanns úr Grindavík með hæstu gjöldin rúmar 102 milljónir. Næstir á blaði koma bræður úr Garðabæ, þeir Einar og Benedikt Sveinssynir, báðir með í kringum 100 milljónir. Þess má geta að þeir eru bræður Ingimundar sem fyrr er getið úr Reykjavík. Fjórði er Kristinn G. Kristinsson í Garðabæ. Fimmti er svo fyrrum Samherjaskipstjórinn og útgerðarmaðurinn Þorsteinn Vilhelmsson í Kópavogi með tæplega milljónir. Reykvíkingar fá rúma 2 milljarða í barnabætur með tæplega 20 þúsund börnum sem þýða rúmlega 100 þúsund krónur á hvert barn. Þá eru 2,2 milljarðar greiddir í vaxtabætur til höfuðborgarbúa til tæplega 24 þúsund manna sem þýðir hátt í 100 þúsund kall á mann.