Bullandi ágreiningur segir Össur

Össur Skarphéðinsson, formaður Samfylkingarinnar, segir bullandi ágreining vera á milli stjórnarflokkanna um frumvarp um þjóðaratkvæðagreiðslu vegna fjölmiðlalaganna eftir að ráðherrar Framsóknarflokksins yfirgáfu skyndilega ríkisstjórnarfund, aðeins fimmtán mínútum eftir að hann hófst í Stjórnarráðinu, klukkan rúmlega tvö í dag.   Össur segir bersýnilegt að Sjálfstæðisflokkurinn hafi stillt Framsóknarflokknum upp við vegg sem sé gamalkunnugt munstur. Það eigi hins vegar eftir að koma í ljós „hversu langt sjálfstæðismenn komist með Framsóknarflokkinn,“ segir Össur og bætir við að þær reglur sem ríkisstjórnin deili um séu að öllum líkindum brot á stjórnarskránni.  Halldór Ásgrímsson utanríkisráðherra sagði eftir ríkisstjórnarfundinn að ekki væri enn búið að ná samkomulagi um frumvarpið og þess vegna hefði ríkisstjórnarfundinum verið slitið skyndilega, en ráðherrar Sjálfstæðisflokksins sátu eftir í fundarherberginu. Davíð Oddsson forsætisráðherra segir að ágreiningur stjórnarflokkanna um frumvarpið sé ekki verulegur og ekki beri mikið í milli um efnisatriði þess, þ. á m. um þátttökulágmark í atkvæðagreiðslunni. Davíð segðist ennfremur ekki búast við nýjum ríkisstjórnarfundi fyrr en í fyrramálið. Eins og greint hefur verið frá gengu ráðherrar Framsóknarflokksins af fundinum eftir að hann hafði staðið yfir í aðeins fimmtán mínútur.   Haft var eftir Halldóri Ásgrímssyni utanríkisráðherra í fréttum Bylgjunnar klukkan 15 að áfram yrði unnið í málinu en hann vildi ekki fullyrða um það hvort niðurstaða fengist í málið síðar í dag. Hann vildi heldur ekki tjá sig um það hver væri helsti ásteytingarsteinninn í tengslum við frumvarpið en stjórnarflokkana greinir á um að hvaða marki eigi að setja skilyrði um lágmark þeirra atkvæðisbærra manna sem þurfi til að fella fjölmiðlalögin úr gildi. Hægt er að hlusta á viðtal við Össur Skarphéðinsson, formann Samfylkingarinnar, sem spilað var í fréttum Bylgjunnar klukkan 17 með því að smella á hlekkinn í fréttayfirlitinu.