Impregilo sakað um hýrudrátt

"Þolinmæði okkar er því sem næst á þrotum og næstu skref eru að fara með þessi mál beint í lögfræðing," segir Aðalbjörn Sigurðsson, framkvæmdastjóri Starfsgreinasambands Austurlands. Fer mjög fjölgandi þeim kvörtunum margra starfsmanna við framkvæmd Kárahnjúkastíflu að launaskrifstofa ítalska verktakans Impregilo, sem skráir niður tímafjölda allra starfsmanna, klípi af tímum sem mest þeir mega. Er svo komið að kröfur nokkurra verkamanna sem hafa borist Starfsgreinasambandinu eru upp á hundruð þúsunda sem þeir telja sig hafa orðið af. "Við höfum sent launaskrifstofu Impregilo erindi vegna þessa aftur og aftur án árangurs og nú er næsta skref að hætta því og fara beint í lögfræðinga. Þarna er um of marga aðila sem gera athugasemdir til að um tilviljun geti verið að ræða enda er eðlilegt hjá svona stóru fyrirtæki að eitthvað fari úrskeiðis annars lagið." Aðalbjörn viðurkennir að Starfsgreinasambandið hafi ekki staðið sig sem skyldi í þessu máli en talsverður tími er síðan fyrst fór að bera á kvörtunum vegna þessa. Hann viðurkennir einnig að þessi staða gæti jafnvel verið enn verri hjá erlendum starfsmönnum Impregilo en hjá þeim Íslendingum sem til hans hafi komið. "Það þarf engan Einstein til að ímynda sér að ef tímum er fækkað á íslenska starfsmenn sem eru yfirleitt ekki hræddir við að láta í sér heyra þá er það ábyggilega gert í ríkari mæli gagnvart erlendum starfsmönnum sem vita ekki hvert á að leita varðandi rétt sinn." Hjá Starfsgreinasambandinu hefur nýlega verið ráðinn starfsmaður í hlutastarf eingöngu til aðstoðar fyrir portúgalska verkamenn sem starfa á virkjunarsvæðinu en þeir skipta hundruðum. Sá talar portúgölsku en Aðalbjörn segir það hafa vafist fyrir þeim hingað til að hafa engan slíkan mann. "Vonandi hefur þetta þau áhrif að kvartanir þeirra heyrast strax og þá verður hægt að beita sér meira fyrir þeirra hönd." Einn heimildarmanna blaðsins sem starfar á virkjunarsvæðinu segir þessa framkomu Impregilo stórundarlega. "Þeir virðast ekki gera sér grein fyrir því að þetta veldur mikilli úlfúð og menn hætta að leggja sig fram í vinnu. Þeir eru í raun að spara sér aurinn en kasta krónunni."