Hverfamiðstöðvar taka til starfa

Sérstakar hverfamiðstöðvar taka til starfa í öllum hverfum borgarinnar. Breytingin sem var samþykkt á fundi borgarstjórnar í gær gegn atkvæðum sjálfstæðismanna hefur áhrif á störf 500 borgarstarfsmanna. Innan vébanda hverfastöðvanna verður nær öll þjónusta borgarinnar við fjölskyldur í Reykjavík, félagsþjónustan, sérfræðiþjónusta fyrir leikskóla og grunnskóla sem áður var veitt hjá Fræðslumiðstöð. Auk þess verða fulltrúar frá íþrótta og tómstundaráði til staðar, og almenn upplýsingaþjónusta um borgarmál. Þegar hefur verið tilkynnt að engum verði sagt upp vegna breytingarinnar en fyrir liggur að starfslýsing mun breytast sem og væntanlega kjör starfsmanna. Fulltrúar verkalýðsfélaganna og borgarinnar hittust á fundi í dag og ræddu áhrif breytingarinnar sem verða unnar í samráði við félögin. Hverfismiðstöðin Miðgarður í Grafarvogi hefur verið rekinn með þessu sniði frá árinu 1997 sem tilraunaverkefni. Þá hefur einnig verið starfrækt hverfamiðstöð í Vesturbæ en með öðru sniði. Hún breytist eftir samþykktina í gær. Sjálfstæðismenn eru andvígir breytingunni og segja kostnað við þjónustuna aukast án þess að sýnt sé fram á að hún batni. Þetta gangi þvert gegn þeim markmiðum að einfalda stjórnkerfi borgarinnar og áhrif borgarfulltrúa og fulltrúa í nefndum og ráðum muni minnka. Lítið samráð hafi verið haft um breytingarnar, við fulltrúa í nefndum og ráðum og þá fjölmörgu starfsmenn sem breytingin nær til.