Magalenti á Siglufjarðarflugvelli

Dornier flugvél Íslandsflugs, TF-ELH, með tvo flugmenn innanborðs magalenti á flugvellinum á Siglufirði í kvöld. Mennina sakaði ekki. Vélin fór frá Reykjavík klukkan 18:30 í áætlunarflugi til Sauðárkróks þar sem hún lenti klukkan 19:10. Vélin fór aftur í loftið frá Sauðárkróki klukkan 19:24 og hugðust  flugmennirnir fara í æfingaflug. Klukkan 19:45 tilkynnti Neyðarlínan flugstjórn í Reykjavíik að flugvélin hefði magalent á Siglufirði og væri hún á miðri flugbrautinni. Rannsóknarnefnd flugslysa hafði þá þegar verið tilkynnt um slysið. Vélin sem er af gerðinni Dornier 228 er mikið skemmd. Rannsóknarnefnd flugslysa óskaði eftir því að flugvél Flugmálastjórnar flygi með rannsóknarmenn til Siglufjarðar en ekki getur orðið af því vegna staðsetningar flugvélar Íslandsflugs á flugbrautinni á Siglufirði.