Brautarljósin björtu

Ný tegund umferðarljósa hefur skotið upp kollinum í höfuðborginni sem þykja bjartari en þau sem vegfarendur hafa áður átt að venjast. Talsverð ásókn er í umferðarljós af hálfu almennings Umferðarljósum hefur fjölgað nokkuð í höfuðborginni síðustu fimm árin. Árið 1999 voru 97 gatnamót með götuvitum en í ár stefnir í að þau verði 111 talsins. Hins vegar hefur fjöldi hnappastýrðra gangbrautarljósa staðið í stað. Að sögn Dagbjarts Sigurbrandsson, umsjónarmanns umferðarljósa hjá Gatnamálastofu, eru flestir nýir götuvitar sem settir eru upp í bænum af þessari nýju gerð. Á síðustu mánuðum hefur þeim verið komið upp víða um borgina, meðal annars á gatnamótum Lönguhlíðar og Miklubrautar og við Stekkjarbakka. Ljóminn skæri stafar af litlum ljósadíóðum, eða tvískautalömpum, sem í æ ríkari mæli leysa hinar hefðbundnu glóperur af hólmi. Dagbjartur telur að birtan eigi eftir að koma sér vel þegar sólin er lágt á lofti. Ekki er nóg með að tvískautalamparnir lýsi skærar heldur eyða þeir margfalt minna rafmagni en glóperurnar, tólf vöttum í stað hundrað vatta. Á síðasta ári hljóðaði rafmagnsreikningurinn fyrir umferðarljós borgarinnar upp á 9.650.000 krónur. Nær tífalt minni rafmagnsnotkun lækkar þann reikning sem því nemur. Á móti kemur að nýju ljósin eru dýrari en þau gömlu, nú kostar hausinn hundrað þúsund krónur. Dagbjartur segir að nokkuð sé um að fólk hafi samband við Gatnamálastofu til að athuga hvort hægt sé að kaupa gömlu ljósin fyrst ný tegund hafi leyst þau eldri af hólmi. Því miður fyrir þetta fólk er einungis perustæðunum skipt út og kíttað upp í þannig að hausinn er áfram notaður. Ásókn fólks í ljós er slík að fyrir hefur komið að umferðarljósum sé hreinlega stolið og í eitt skipti fannst fulltengdur götuviti í fíkniefnagreni sem lögreglan hafði ráðist inn í. Til viðbótar brautarljósunum björtu eru ýmsar spennandi nýjungar í deiglunni hjá Dagbjarti og félögum, til dæmis skynjarar sem nema hreyfingar vegfarenda.