Umfangsmikil leit að Sri Rahmawati

Lögregla hefur staðið fyrir umfangsmikilli leit að Sri Rahmawati, 33 ára gamalli konu sem saknað hefur verið í nær tvær vikur. Leitað hefur verið á höfuðborgarsvæðinu og lögreglsa notið aðstoðar hjálparsveita. Lögreglan í Reykjavík sendi frá sér tilkynningu í kjölfar þeirrar umræðu sem orðið hefur um rannsóknina en lögreglu þótti rétt að upplýsa fjölmiðla um ákveðin atriði sem varða málið. Í tilkynningu lögreglunnar kemur fram að unnið hafi verið markvisst að rannsókn málsins og að rætt hafi verið við fjölda fólks og hugsanleg vitni. „Leit hefur farið fram á nokkrum stöðum og hefur lögregla notið aðstoðar björgunarsveita, m.a.sérhæfðra leitarhópa. Þyrla hefur verið notuð til að skoða ákveðin svæði,“ segir í tilkynningu lögreglu. Þá kemur fram að lögreglumenn með leitarhunda hafi farið um á völdum stöðum og að skipulega hafi verið farið um staði í nágrenni Reykjavíkur. Í íbúð mannsins, sem situr í gæsluvarðhaldi og bíl hans fannst blóð sem verið er að athuga hvort komið hafi úr Sri. Sú athugun fer fram með rannsókn á erfðaefni í blóðinu og er gerð í Noregi. Að sögn Sigurbjarnar Víðis Eggertssonar, aðstoðaryfirlögregluþjóns í Reykjavík, standa vonir til að niðurstaða liggi fyrir í byrjun næstu viku. "Við látum væntanlega fjölmiðla vita þegar niðurstaðan berst," sagði hann.