Deilt um skipun hæstaréttardómara

Skipun í embætti hæstaréttardómara í stað Péturs Hafsteins er þegar orðin umdeild þótt enginn hafi verið skipaður enn. Lögmenn deila þessa dagana bæði um menn og aðferðir. Hópur hæstaréttarlögmanna stendur þessa dagana fyrir undirskriftasöfnun í kjölfar umsagnar Hæstaréttar um umsækjendur um embætti hæstaréttardómara. Þar eru lagaprófessorarnir Eiríkur Tómasson og Stefán Már Stefánsson taldir bera af öðrum og Hjördís Hákonardóttir sett í þriðja sæti. Aðrir eru flokkaðir þar fyrir neðan. Sveinn Andri Sveinsson, hæstaréttarlögmaður segir að með fullri virðingu fyrir öðrum umsækjendum finnist sér Jón Steinar ekki njóta sannmælis. Störf lögmanna séu ekki metin sem skyldi og þegar lögmaður í fremstu röð hljóti ekki náð umsagnaraðilans, séu það skilaboð til lögfræðinga um að sækja ekki um stöðu sem þessa. Fyrirkomulag við skipun hæstaréttardómara var til umræðu á fundi Lögréttu, félags lögfræðinema við Háskólann í Reykjavík, í hádeginu dag. Þar var hart deilt á Hæstarétt, en mörgum finnst sem skort hafi samræmi í umsögnum hans. Einhverjir eru á því að rétturinn hafi vísvitandi reynt að gera ráðherra erfitt fyrir að ráða Jón Steinar Gunnlaugsson á meðan aðrir segja Hæstarétt fyrst nú, þegar hann rökstyður mat sitt og raðar umsækjendum, vera að sinna hlutverki sínu. Margir sögðu tímabært að menn horfðust í augu við að ráðning í þetta embætti væri pólitísk. Ástráður Haraldsson, hæstaréttarlögmaður segir það hafa pólitíska þýðingu hver sitji í réttinum á hverjum tíma. Það sé mjög slæmt að Dómsmálaráðherra gegni til dæmis starfinu um árabil og raði á meðan mönnum úr sínum flokki í stöður hæstaréttardómara. Hann segir þess ekki hafa verið gætt nógu vel að rétturinn endurspegli fjölbreytileika þeirra skoðana sem séu uppi í samfélaginu. Lögmenn virðast skiptast í hópa í þessu máli, þá sem fylgja Jóni Steinari og þá sem gera það ekki. Margir telja Davíð Oddsson eiga nægilega marga vini í réttinum og benda á spilafélagann Árna Kolbeinsson og frændann Ólaf Börk Þorvaldsson. En jafnvel þeir sem tala á þennan máta telja langt gengið hjá réttinum að flokka Jón Steinar ekki með hæfustu umsækjendum. Enginn virðist öfunda Geir Haarde, hann geti ekki unnið sama hvern hann velur. Þeir sem standa að undirskriftarsöfnuninni til stuðnings Jóni Steinari segja hana ganga vel, en hugmyndin fær þó misjafnar undirtektir. Ástráður segir það ekki heppilegt að menn séu komnir út í svona vinnubrögð og æskilegast væri að hætt yrði við það.