Við munum vinna Ungverja

Þórður Guðjónsson tjáir sig um leikinn við Ungverja í einkaviðtali við fréttablaðið. Hann segir úrslit leikjanna í íslenska riðlinum á laugardaginn hafa verið hræðileg fyrir íslenska landsliðið. „Ungverjarnir hafa verið á mikilli uppsiglingu undanfarið. Ég sá hluta af leiknum hjá þeim gegn Þjóðverjum í sumar sem þeir unnu 2-0. Þetta er lið sem byggir ekki á ólíkum leikaðferðum og við beitum – þeir verjast vel, beita svo skyndisóknum og eru fljótir fram. Þess vegna er ég að vonast til að það henti okkur vel að spila þennan leik. Þeir ætla sér sigur og við getum þá beitt okkar sterkustu vopnum, það er sterkri vörn og svo skyndisóknum,“ segir Skagamaðurinn snjalli Þórður Guðjónsson. Hræðileg úrslit Þórður segir að tapleikurinn gegn Búlgaríu á laugardaginn hafi verið vonbrigði. „Úrslitin voru hræðileg fyrir okkur. Það var algjör óþarfi að tapa þessum leik og það gekk allt upp hjá þeim. Þeir ætluðu ekki að fá á sig mark, ætluðu að spila sterka vörn og vissu það að Berbatov frammi hjá þeim myndi klára leikinn fyrir þá eins og hann sýndi síðan,“ segir Þórður. „Mér fannst að við vera vinna okkur hægt og þétt inn í leikinn en mörkin brutu okkur svolítið niður. Við náðum að minnka muninn í 2-1 en svo kom rothöggið 3-1. Það er erfitt þegar lið fær þrjá skelli.” Rúnar Kristinsson og Pétur Hafliði Marteinsson verða fjarri góðu gamni á miðvikudag þar sem þeir eru meiddir. Brynjar Björn Gunnarsson verður heldur ekki með þar sem hann fékk að líta rauða spjaldið í leiknum gegn Búlgaríu og er í leikbanni. „Hópurinnn á að vera það sterkur að við getum dekkað það þó það vanti tvo til þrjá leikmenn,” segir Þórður sem er staðfastur á því að íslenskur sigur muni líta dagsins ljós gegn Ungverjum. „Við vinnum leikinn.“ Þórður er með leikjahæstu mönnum landsliðsins og einn af þeim eldri í leikmannahópnum. Eldist eins og hinir „Ég klæði mig alltaf í vesti þegar það er skipt ungir og gamlir, þannig að ég upplifi mig enn sem ungan mann. Engu að síður er það staðreynd að ég er þriðji elsti maðurinn í hópnum í dag. Ég eldist eins og allir hinir,“ segir Þórður hlæjandi. „Við erum með fína blöndu af yngri og eldri leikmönnum. Ungi strákarnir eru með töluvert mikla reynslu, flest allir með reynslu af því að spila erlendis.“ Þórður hefur leikið með þýska úrvalsdeildarliðinu Bochum síðustu ár en reyndi fyrir þetta tímabil að fá sig lausan undan samningnum. Það tókst ekki. Átta nýir leikmenn „Það fóru þrír leikmenn úr byrjunarliðinu fyrir þetta tímabil en það komu átta nýir leikmenn til baka. Þeir vildu samt ekki hleypa mér frá klúbbnum. Ég hefði viljað komast burt í sumar. Mér stóðu til boða mörg fín og góð tilboð til dæmis í Þýskalandi, Austurríki og Belgíu. Eitt tilboðið var frá liði í næsta nágreni við mig og það hefði verið upplagt fyrir að mig að fara þangað því þá hefðum við ekki þurft að flytja,“ segir Þórður. Skagamaðurinn snjalli kann vel við sig í Þýskalandi en hann á tvö ár eftir af samningum við Bochum. „Ég verð alla vega tvö ár í viðbót en svo sér maður til hvað gerist.“