Ríki og sveit ræðast loks við

Mikillar gremju gætir nú meðal sveitarstjórnarfólks vegna bágrar fjárhagsstöðu sveitarfélaganna. Pattstaða var komin upp í samskiptum þeirra og ríkisins þar sem nefnd á vegum félagsmálaráðuneytisins sem átti að skoða tekjustofna sveitarfélaganna, og sveitarstjónarmenn bundu vonir sínar við, hafði ekki komið saman síðan í vor. Það var vegna ágreinings innan nefndarinnar. Kristján Þór Júlíusson, fulltrúi sveitarfélaganna í nefndinni vildi að hún endurskoðaði tekjuskiptingu ríkis og sveitarfélaga en fulltrúar ríkisins í nefndinni vildu aðeins skoða verkefnatilfærslu frá ríki til sveitarfélaga, skipulag jöfnunarsjóðs sveitarfélaga og áhrif sameiningar sveitarfélaga. Samkomulag fjármálaráðherra, félagsmálaráðherra og Sambands íslenskra sveitarfélaga, sem undirritað var í síðustu viku, hleypti hins vegar nýju lífi í þessi samskipti. Í samkomulaginu er gert er ráð fyrir að víkka umboðið nefndarinnar svo að fulltrúar ríkisins geti komið til móts við óskir sveitarstjórnarmanna. Hermann Sæmundsson, fyrrverandi ráðuneytisstjóri og formaður nefndarinnar segir að hún komi saman við fyrsta tækifæri. Hún eigi nú að fjalla um horfur í fjármálum sveitarfélaga með sérstakri áherslu á þau sveitarfélög sem standa höllum fæti. Þá verði einnig skoðað hvort rýmka beri núverandi tekjustofn sveitarfélaganna og hvort koma eigi á nýjum tekjustofnum. Fjármálaráðstefna sveitarfélaganna fer fram í nóvember og heimildarmenn blaðsins telja að þar kunni sveitarstjórnarfólk að fá útrás fyrir gremju sína. Á ráðstefnunni í fyrra hafi menn verið einhuga um að hagur sveitarfélaganna væri óviðunandi. Síðan þá hafi lítið breyst til batnaðar. Það kunni því að fara svo að sveitarstjórnarfólk verði við áeggjan Steingríms J. Sigfússonar, formanns Vinstrihreyfingarinnar- græns framboðs, sem hvatti það fyrir skömmu til að gera uppreisn ef ríkið héldi áfram að daufheyrast við kröfum um lagfæringu á tekjustöðu sveitarfélaganna.