Ítalir sátu eftir

Ítalir gerðu allt sem í valdi þeirra stóð til að komast áfram í 8-liða úrslit Evrópukeppninnar og sigruðu Búlgara 2-1. Þeim til mikillar gremju fór leikur Dana og Svía á þann eina veg sem þýddi að Ítalir kæmust ekki áfram, eða 2-2 jafntefli. Þrátt fyrir sín fimm stig og að hafa ekki tapað leik í keppninni sitja Ítalir eftir með sárt ennið. Áfallið er mikið fyrir ítölsku þjóðina sem og ítalska knattspyrnu og kom það ekki á óvart þegar tár sáust falla á meðal ítölsku leikmannanna að leik loknum. "Við berum höfuðið hátt þótt við séum á leið heim því við áttum sigurinn skilið í leiknum gegn Svíum," sagði Giovanni Trapattoni, þjálfari Ítala, eftir leikinn, en búast má við því að hann verði harðlega gagnrýndur á næstu dögum fyrir slaka frammistöðu Ítala í keppninni. Sigurinn hjá Ítölum var ekki auðfenginn, því þótt Búlgarar hafi fyrirfram ekki átt neina möguleika á að komast áfram var eingöngu spilað upp á heiðurinn og börðust þeir grimmilega gegn nokkuð breyttu liði Ítala. Mjög óvænt náðu þeir forystu með marki Martin Petrov úr vítaspyrnu á síðustu mínútu fyrri hálfleiks, en það voru ekki nema þrjár mínútur liðnar af seinni hálfleik þegar Simone Perrotta jafnaði leikinn eftir þunga sókn. Síðan var blásið til stórsóknar af hálfu Ítala, enda kom ekkert nema sigur til greina hjá þeim ef þeir ætluðu sér áfram. Eftir því sem á leið jókst sóknarþunginn en lítið gekk. Þar að auki var dómarinn ekki hliðhollur Ítölum og var augljósri vítaspyrnu sleppt þegar skammt var eftir. Það var síðan ekki fyrr en eftir hefðbundinn leiktíma sem Antonio Cassano tryggði Ítölum sigurinn, Ítalir réðu sér vart af kæti og allt vitlaust á vellinum. Í miðjum fagnaðarlátunum fengu þeir síðan fregnir af því að Svíar hefðu jafnað gegn Dönum og var þá gleðin ekki lengi að breytast í martröð. Ítalir áttu engan möguleika á að komast áfram þar sem innbyrðis markatala Svía og Dana yrði ávallt betri en þeirra.