Að ná meirihluta er eins og að smala köttum

Jóhanna Sigurðardóttir, forsætisráðherra, boðaði sérstaka rannsóknarnefnd um einkavæðingu bankanna tæki núverandi rannsóknarnefnd ekki á því máli með skýrum hætti í óbirtri skýrslu.

Þetta sagði hún í ræðu sinni á flokkstjórnarfundi Samfylkingarinnar sem er haldin á Hótel Loftleiðum. Þá sagði hún að það færi of mikill tími í að smala saman meirihluta á Alþingi, slíkt væri eins og að smala köttum.

„Það verður forvitnilegt að sjá hvernig þessu verða gerð skil í rannsóknarskýrslunni, en ég hef þegar ákveðið að verði þau ekki ítarleg mun ég beita mér fyrir setningu laga um sérstaka rannsókn á einkavæðingunni," sagði Jóhanna sem vill að einkavæðingin verði gerð upp með ítarlegum hætti.

Þá vék Jóhanna einnig að samstarfsflokki sínum í ríkisstjórn í ræðunni.

„það heldur engin ríkisstjórn það út til lengdar að búa við óvissan og ótraustan meirihluta í stórum og erfiðum málum. Á óvissu- og erfiðleikatímum er það lykilatriði að ríkisstjórn hafi traust og fast land undir fótum," sagði hún og bætti við:

„Hoppandi meirihlutar á Alþingi duga skammt við aðstæður eins og okkar þjóð gengur í gegnum og of mikil orka og tími fer að smala þeim saman og ná málum í gegn. Ein flokksystir okkar orðaði þetta ágætlega þegar hún sagði að þetta væri eins og að smala köttum."