Búið að lífláta Bigley?

Breski gíslinn Kenneth Bigley, sem haldið er föngnum af mannræningjum í Írak, hefur verið tekinn af lífi samkvæmt tilkynningu sem birt var á íslamskri vefsíðu í dag. Breska utanríkisráðuneytið segist ekki taka tilkynninguna trúanlega, enda hafi vefsíðan áður birt tíðindi af gíslum í Írak sem svo hafi komið í ljós að ekki áttu við rök að styðjast.

Se og hör fær dóm í Danmörku

Ritstjórar og blaðamenn danska tímaritsins <em>Se og hör</em> voru dæmdir til greiðslu sektar að andvirði tæplega átta hundruð þúsunda íslenskra króna fyrir dönskum dómstólum í gær. Blaðið fjallaði í nóvember 2002 um ástamál Önju Andersens sem er þekktasta handboltakona Danmerkur.

Upplausn á Haítí

Aðframkomnir íbúar Haítís reyndu í gær að brjótast inn í matvælageymslur hjálparstofnana til að verða sér úti um mat og vatn. Fellibylurinn Jeanne, sem lagði norðurhéruð Haítís í rúst fyrr í vikunni, stefnir nú á Flórída-ríki þar sem hátt í milljón manns hefur flúið heimili sín.

Óvíst um afdrif Bigleys

Misvísandi fréttir berast um afdrif Kens Bigleys, breska gíslsins sem situr í haldi mannræningja í Írak. Bandaríkjaher gerði í morgun stórsókn á Falluja í enn einni tilrauninni til að uppræta hryðjuverkahóp Al-Zarqawis, sem er öfgahópurinn sem rændi Bigley og reyndar mörgum fleirum. 

Olíuverð hækkar í kjölfar Ívans

Verð á olíu í heiminum hækkaði mikið í liðinni viku og hefur aldrei verið hærra. Áhyggjur af minnkandi birgðum í Bandaríkjunum og fellibylurinn Ívan eru talin valda hækkuninni að þessu sinni. Hækkunin nam fjórum bandaríkjadölum og var verðið 48,9 dalir á tunnu þegar markaðir lokuðu á föstudag, litlu hærra en 19. ágúst í sumar þegar það náði síðast hámarki.

Matvælum dreift til fólksins

Keppst er við að dreifa mati og drykkjarvatni til íbúa Haítí sem búa enn við skort eftir að fellibylurinn Jeanne olli þar miklum flóðum. Verst er ástandið í borginni Gonaives þar sem jafnframt er skortur á lyfjum og læknisaðstoð.

Náðarhögg ESB?

Hafni margar Evrópusambandsþjóðir nýrri stjórnarskrá sambandsins í þjóðaratkvæðagreiðslum gæti það reynst náðarhögg evrópska verkefnisins að mati Romanos Prodis, forseta framkvæmdastjórnar Evrópusambandsins. Hafni eitt ríki stjórnarskránni sé hægt að bjarga því, en verði þau mörg sé úti ævintýri.

Olíuverð nálgaðist sögulegt hámark

Olíuverð nálgaðist sögulegt hámark í gær þegar fatið var komið yfir fjörutíu og níu dollara þegar lokað var á markaði í Bandaríkjunum. Í morgun hefur það lækkað nokkuð á ný í Asíu. Litlar olíubirgðir eru sagðar ástæða þessa og virðist engu hafa breytt að Bandaríkjastjórn ákvað að opna neyðarbirgðir sínar til að auka framboð.

Ókeypis laxveiði í Noregi

Norsk yfirvöld hafa gripið til þess ráðs að bjóða almenningi til ókeypis laxveiða í ám í Suður- Hörðalandi og er fólk hvatt til að veiða allt hvað það getur. Það er þó ekki fyrir gjafmildi eða ummhyggju fyrir þegnunum að stjórnvöld gera þetta heldur hefur orðið vart við tugi þúsunda strokulaxa á svæðinu.

Grátbað stjórnina um miskunn

Utanríkisráðherra Breta segir að breska ríkisstjórnin reyni allt sem í hennar valdi standi til að reyna að tryggja lausn breska gíslsins, Ken Bigley. Breskir ráðamenn hafa þó útilokað með öllu að semja eða ræða beint við öfgahópinn sem heldur honum föngnum.

Ófrjó en ól samt barn

Belgískri konu, sem varð ófrjó vegna geislameðferðar, hefur nú verið gert kleift að eignast barn með aðferð sem talin er byltingarkennd í læknisfræðinni og gæti valdið straumhvörfum fyrir ungar konur sem fá krabbamein.

Ráðist á danska sendiráðið

Mótmælendur réðust á danska sendiráðið í Stokkhólmi í Svíþjóð í morgun, brutu þar rúður og skvettu rauðri málningu á veggina til að mótmæla stuðningi dönsku ríkisstjórnarinnar við stríðið í Írak. Thomas Lehmann, sendifulltrúi í sendiráðinu, segir að hópur sem kallar sig Global Intifada hafi staðið fyrir aðgerðunum. Danir hafa sent hersveitir til Íraks.

Blóðug borgarastyrjöld möguleg

Blóðug borgarastyrjöld gæti brotist út í Súdan, leysist friðarviðræður stjórnvalda og aðskilnaðarsinna upp. Þetta er mat æðsta fulltrúa Sameinuðu þjóðanna í Súdan. Hann óttast að ástandið yrði þá sambærilegt við hörmungarnar í Sómalíu.

Pútín neitar ásökunum

Vladímír Pútín, forseti Rússlands, neitar því að stjórnarhættir hans séu afturhvarf til sovéskra hátta. Hann segir frelsi og lýðræði lykilinn að bjartri framtíð. Ýmsar hugmyndir, sem Pútín hefur kynnt undanfarnar vikur, hafa vakið undrun á Vesturlöndum og þótt benda til þess að hann safni sífellt meiri völdum til sín.

Opið allan sólarhringinn?

Þjóðverjar velta því nú fyrir sér hvort þeir kæri sig um að verslanir geti verið opnar allan sólarhringinn. Efri deild þýska þingsins skoðar nú frumvarp til laga sem gefur verslunartímann frjálsan. Það yrði þá í verkahring sambandslandanna að ákveða opnunartíma.

Bara hörð leikföng

Efni sem gera plast mjúkt hafa verið bönnuð innan Evrópusambandsins. Mjúkt plast er gjarnan notað í barnaleikföng og það er meginástæða bannsins, þar sem óttast er að efnin geti verið hættuleg heilsu barna. Vísindamenn telja að efnin geti meðal annars haft áhrif á æxlunarfæri barnanna þegar þau eru komin á fullorðinsaldur.

Ekki vitað um afdrif Bigleys

Ekki er vitað hvort Bretinn Kenneth Bigley, sem hefur verið í haldi mannræningja í Írak, er lífs eða liðinn en mannræningjarnir hafa hótað að drepa hann. Öldruð móðir Bigleys bað honum griða í sjónvarpi í gærkvöldi og féll að því loknu saman. 

Segja sig úr kirkjunni í hrönnum

Úrsögnum úr rómversk-kaþólsku kirkjunni í Austurríki hefur fjölgað verulega undanfarna mánuði. Ástæðan er hneykslismál sem hafa umlukið kirkjuna. Snemma í sumar uppgötvaðist mikið magn barnakláms í prestaskóla og einn þekktasti prestur landsins hefur verið sakaður um að beita sóknarbörn á táningsaldri kynferðislegu ofbeldi.

Vill heimastjórn í Darfur

"Skýrt framsal á völdum verður að eiga sér stað í Darfur," sagði Ruud Lubbers, flóttamannafulltrúi Sameinuðu þjóðanna, þegar hann hvatti til þess að íbúar Darfur fengju heimastjórn. Súdönsk stjórnvöld hafa hingað til sagst reiðubúin að semja um slíkt en hafa ekki viljað ganga jafn langt og uppreisnarmenn krefjast.

Handteknir vegna mengunar

Sex stjórnendur og starfsmenn bandarísks námufyrirtækis hafa verið handteknir í Indónesíu vegna rannsóknar á því hvort fyrirtækið hafi hent hættulegum úrgangi í sjó með þeim afleiðingum að íbúar í nágrenninu veiktust.

Nauðgað til að tryggja giftingu

Fjöldi eþíópískra stúlkna hefur orðið fórnarlamb manna sem ræna þeim og nauðga. Þannig vilja mennirnir tryggja að þeir fái að giftast þeim og þurfi ekki að greiða foreldrum þeirra jafn mikið og ella væri raunin.</font /></b />

Manntjón af völdum Jeanne

175 þúsund manns urðu fyrir barðinu á fellibylnum Jeanne þegar hann gekk yfir Haítí. Ástandið í landinu er vægast sagt skelfilegt, lík hrannast upp og hjálparstarfsmenn neyðast til að urða þau í fjöldagröfum. Það er meginverkefni hjálparstarfsmannanna auk þess sem þeir dreifa matvælum til tugþúsunda sem hafa hvorki vott né þurrt.

Breski gíslinn grátbiður Blair

Breski gíslinn, sem mannræningjar í Írak hóta að skera á háls, grátbiður Tony Blair um að þyrma lífi sínu á myndbandsupptöku sem birt var á íslamskri netsíðu í nótt. Kenneth Bigley er síðasti gíslinn af þremur í haldi sömu mannræningja, en hinir tveir hafa þegar verið drepnir. Hann endurtók í sífellu að hann vildi ekki deyja í Írak.

Olían hækkar enn

Olíuverð hækkaði enn á ný í gær og var komið yfir 48 dollara á fatið áður en lokað var á markaði í gær. Síðan lækkaði verðið rétt niður fyrir 48 dollara. Þetta gerðist þegar orkumálaráðuneytið staðfesti að gengið hefði á eldsneytisbirgðir í kjölfar fjölda fellibylja undanfarnar vikur.

Ívan ekki enn hættur

Leifarnar af fellibylnum Ívan hafa nú þróast í Hitabeltisstorm, sem kominn er inn í Mexíkóflóa. Viðvaranir hafa verið sendar út þar og í Texas, þar sem búist er við að stormurinn komi snemma á morgun.

Mihajlovich fluttur

Mihajlo Míhajlovich, maðurinn sem myrti Önnu Lindh, utanríkisráðherra Svíþjóðar, var í nótt fluttur í skyndi frá réttargeðdeild á Huddinge-sjúkrahúsinu til annarar réttargeðdeildar. Ástæðan er sú að læknar óttuðust um öryggi hans og töldu líklegt að honum yrði sýnt banatilræði á sjúkrahúsinu.

Mugabe úthúðar Bush og Blair

Robert Mugabe, forseti Zimbabwe, segir George Bush hegða sér eins og hann sé guð almáttugur, með Tony Blair sem spámann sinn. Þessu lýsti Mugabe yfir á fundi Sameinuðu Þjóðanna í New York, þar sem hann sagði Bandaríkin og Bretland sprengja saklausa Íraka í nafni lýðræðis.

Írar drekka of mikið

Kostnaður vegna óhóflegrar áfengisdrykkju í Írlandi nam rúmum 200 milljörðum króna á síðasta ári, samkvæmt niðurstöðum nýrrar rannsóknar þar í landi. Þá eyddi hver Íri að jafnaði tæpum 200 þúsund krónum í áfengi í fyrra og er það mun meira en í öðrum löndum.

Hitti hann óvininn?

Samtök fyrrverandi stríðsmanna í Bandaríkjunum, sem í síðasta mánuði stóðu fyrir umdeildum auglýsingum til stuðnings George Bush, eru enn við sama heygarðshornið. Nú ætla samtökin að eyða um hundrað milljónum króna í auglýsingar þar sem leitt verður að því líkum að John Kerry hafi hitt leiðtoga Vietnama á meðan á stríðinu þar stóð.

Líf Bretans hangir á bláþræði

Líf bresks gísl í Írak hangir á bláþræði, en bresk stjórnvöld þvertaka fyrir að semja við hryðjuverkamenn. Gíslinn og fjölskylda hans grátbiðja um að lífi hans verði þyrmt.

Bretar ósáttir við meðferð á Cat

Bretar eru öskuillir yfir því að Cat Stevens hafi verið vísað úr landi og segja fáránlegt að farþegavél með mörg hundruð manns hafi verið vísað frá Washington þar sem Stevens var um borð. Utanríkisráðherra Bretlands hefur sent formlega kvörtun til Washington.

Haiti þarf hjálp

Koma verður íbúum Haití til hjálpar þegar í stað. Matar- og vatnsskortur ógnar lífi þeirra sem lifðu fellibylinn Jeanne og flóð í kjölfarið.

GSM sem finnur lykt

Þýskt farsímafyrirtæki hyggst kynna nýstárlega farsíma sem geta greint og bent notendum á þegar þeir eru andfúlir eða lykta illa af svitalykt. Talsmenn fyrirtækisins segja að örlítil flaga sjái um þessar lyktarrannsóknir.

Hlýða ekki mannræningjum

Ríkisstjórnir Bretlands og Írak segjast ekki ætla að láta að kröfum mannræningja, þrátt fyrir myndband frá breska gíslinum Kenneth Bigley, þar sem hann grátbiður Tony Blair um að hjálpa sér.

Erdogan þrýstir á ESB

Forsætisráðherra Tyrklands, Recep Tayyip Erdogan, er kominn til Brussel, til þess að þrýsta á Evrópusambandið að hefja aðildarviðræður við Tyrki. Hingað til hefur Evrópusambandið lýst því yfir að Tyrkir þurfi að bæta refsilöggjöf sína og mannréttindamál til þess að eiga þess kost að hefja aðildarviðræður að sambandinu.

Gyðingar hallast að Kerry

George Bush gengur ekki nógu vel að fá Gyðinga á sitt band samkvæmt skoðanakönnunum. Í nýrri könnun frá samtökum Gyðinga í Bandaríkjunum kemur fram að 69% þeirra hyggjast kjósa John Kerry, frambjóðanda Demókrata, en aðeins 24% hyggjast kjósa Bush.

Allawi segir Írak á réttri leið

Iyad Allawi, forsætisráðherra Íraks, hélt ræðu á Bandaríkjaþingi í dag, þar sem hann sagði að lýðræði væri að komast á í landinu. Þrátt fyrir vandamál undanfarið og aftöku tveggja gísla væri ætlunarverkið á réttri leið.

Tímamót í Frakklandi

Franskur dómstóll kvað í dag upp tímamótadóm þar sem lesbískt par er úrskurðað sameiginlegir foreldrar barna þeirra. Konurnar eiga þrjár dætur sem önnur þeirra gekk með eftir tæknifrjóvgun, en hin konan hefur ekki talist foreldri barnanna.

Hraðskreiðasti vetnisbíll heims

Þýski bílaframleiðandinn BMW kynnti hraðskreiðasta vetnisbíl heims á bílasýningunni í París. Tegundin sem ber undirheitið H2R og getur náð meira en 300 kílómetra hraða á klukkustund. Burkhard Goeschel stjórnarmaður í BMW segir að framtíðin felist í vetni.

Vandræði á Haiti

Íbúar Haítí glíma við eftirmála fellibylsins Jeanne sem olli þar miklum flóðum. Flóðavatn og eðja hamla víða hjálparstarfi, en á annað hundrað þúsund manns eru án matar og vatns. Fólkið neyðist til að drekka flóðavatnið, þar sem lík og hræ eru á floti.

Líf Kenneths hangir á bláþræði

Kenneth Bigley er sextíu og tveggja ára gamall Breti, sem er í haldi mannræningja í Írak. Þeir hóta að skera hann á háls, og enginn virðist geta gert nokkuð til að koma í veg fyrir það. Kenneth Bigley er síðasti gíslinn af þremur sem hópur mannræningja í Írak hefur í haldi.

Kerry gagnrýnir draumaheim Bush

John Kerry segir að Iyad Allawi, forsætisráðherra Íraks, hafi verið fenginn til að halda erindi á Bandaríkjaþingi í dag til þess að láta líta út fyrir að gangur mála í Írak sé í lagi. Reyndin sé hins vegar önnur, eins heyra megi af hermönnum á vettvangi og af skýrslum leyniþjónustunnar, CIA.

Bush gefur ekkert eftir í Írak

„Við munum ekki yfirgefa Írak," sagði Georg Bush í dag á fundi sem hann átti með Iyad Allawi, forsætisráðherra Íraks í dag. Bush sagði að gæfu Bandaríkjamenn eitthvað eftir eða jafnvel færu á brott, stefndi það öryggi landsins í verulaga hættu. „Mistækist okkur í Írak yrði það upphafið að löngu basli," sagði Bush einnig.

Enn flýja sænskir fangar

Tveir fangar ógnuðu starfsmönnum Mariefred fangelsisins með hnífi, tóku einn þeirra í gíslingu og lögðu síðan á flótta. Þetta er í þriðja skipti á jafn mörgum mánuðum sem fangar flýja úr sænskum fangelsum þrátt fyrir að allir fangarnir hafi dvalið í fangelsum þar sem öryggisgæsla er hvað mest.

Barist um matvæli

Til átaka kom sums staðar þegar Haítíbúar börðust um mat og drykkjarvatn, sem er af skornum skammti eftir að hitabeltisstormurinn Jeanne gekk yfir landið. Rúmlega 1.100 manns létust af völdum stormsins og 1.250 manns er enn saknað. Því má gera ráð fyrir að tala látinna hækki enn.