Sprenging við hótel í Bagdad

Að minnsta kosti tvær sprengjuvörpur lentu í götu nálægt hóteli í Bagdad í dag. Í það minnsta þrír særðust og tveir bílar brunnu. Gestir hótelsins eru sagðir að mestu leyti útlendingar. Það er því sem næst daglegur viðburður að uppreisnarmenn skjóti sprengjuvörpum að hótelum eða opinberum byggingum í Bagdad.

Froskahátíð í Oregon

Árleg froskahátíð var haldin í fjórða sinn í Oregon í Bandaríkjunum í gær. Meðal fastra liða á hátíðinni er froskahlaup, þar sem menn og froskar hoppa saman. Þeir sem ekki áttu frosk gátu leigt þá en markaðsverð á froskaleigunni í Oregon er rúmar 200 krónur.

Blómaganga í Kólumbíu

Hundruð manna tóku þátt í árlegri blómagöngu í Kólumbíu í gær. Gangan er hluti blómahátíðar sem stendur yfir í eina viku. Mann fram af manni hafa Kólumbíumenn útbúið miklar blómaskreytingar í tengslum við hátíðina.

Par rændi barni í Ástralíu

Ástralskt par rændi þriggja vikna barni frá móður þess, með því að úða piparúða í augu hennar, fyrir utan verslunarmiðstöð í Melbourne í gærkvöldi. Móðirin grátbiðu ræningjana um að skila barninu.

Uppreisnarmenn leggja niður vopn

Yfir 200 uppreisnarmenn í Darfúr-héraði í Afríkuríkinu Súdan lögðu niður vopn í dag. Liðsmenn Tora Bora sveitarinnar afhentu yfirvöldum vopn sín við landamærin við Tsjad, en þeir hafa barist ásamt öðrum skæruliðahópum gegn stjórnvöldum í Súdan.

Síðasta mannvirkið vígt

Miðasala á Ólympíuleikana í Grikklandi, sem hefjast á föstudaginn, hefur tekið við sér eftir rólega byrjun. Eitt af síðustu mannvirkjunum var vígt í gær, þriggja kílómetra löng brú sem tengir suðurhluta landsins við meginlandið.

Hörð átök í Najaf

Bandarískar herþyrlur skutu á sjíta múslima í íröksku borginni Najaf í dag, nokkrum klukkustundum eftir að írakski forsætisráðherrann hafði hvatt uppreisnarmenn til að leggja niður vopn. Hann fór óvænt í stutta heimsókn til borgarinnar í dag, en þar hafa geisað hörð átök í fjóra daga.

Uppreisnarmenn rændu Írana

Uppreisnarmenn í Írak segjast hafa rænt írönskum stjórnarerindreka. Írönsk yfirvöld hafa staðfest að starfsmanns þeirra sé saknað en hafa ekki gefið upp hvort þau telja að honum hafi verið rænt. Maðurinn hvarf á miðvikudag í síðustu viku þegar hann var á leið til Karbala frá Bagdad.

Dreifa lyfjum vegna geislunar

Ísraelsk yfirvöld dreifa lyfjum til varnar veikindum vegna geislavirkni í byggðarlögum nálægt kjarnaofnum sínum. Þetta er gert í því skyni ef ofnarnir munu leka. Lyfin hafa hingað til verið í vörslu yfirvalda en ákveðið var að þeir sem búa næst ofnunum eigi að hafa þau við höndina til að stytta viðbragðstímann ef eitthvað kemur upp á.

Límdi sig við kærustuna

Þýskur maður sem stendur til að framselja frá Spáni til Þýskalands límdi sig við kærustu sína til að fresta fyrirtöku málsins og vekja athygli á því.

Vilja afnema 24. ára reglu

Héraðsformenn danska Sósíaldemókrataflokksins vilja afnema eða milda svokallaða tuttugu og fjögurra ára reglu í útlendingalögum. Reglan er sams konar og sú sem rædd var hér á landi þegar til umræðu var beyting á útlendingalögum á Alþingi.

Hryðjuverkamenn gefa út geisladisk

Hryðjuverkasamtök undir stjórn Jórdanans al-Zarqawi, hafa gefið út margmiðlunardisk, þar sem múslimar eru hvattir til vopna í baráttunni gegn krossförum í Írak, eins og það er orðað. Á tölvugeisladiskinum, sem er 45 mínútur að lengd, er einnig hótað að drepa forsætisráðherra íröksku bráðabirgðastjórnarinnar.

Óttast fjölgun kúariðu í mönnum

Breskir vísindamenn óttast að kúariða í mönnum, eða Kreuzfeld Jakobs veikin, breiðist út í mönnum á næstunni með áður óþekktum hraða. Nýjar rannsóknir sýna að sjúkdómurinn getur smitast í gegnum blóðgjafir og einnig hefur komið í ljós að mun fleiri genategundir eru móttækilegar fyrir sjúkdómnum en áður var talið.

Myndband með aftöku birt

Myndband af því þegar bandarískur gísl var hálshöggvinn af mannræningjum í Írak, var birt í morgun, á vefsíðu samtaka tengdum al-Qaeda. Á myndbandinu segir ungur maður að hann heiti Benjamin Ford og sé frá San Fransisco. Hann segir að verði bandarískir hermenn ekki kallaðar frá Írak verði þeir allir aflífaðir á þennan hátt.

Rændir af mönnum í löggubúningi

Tveir mexíkóskir myndatökumenn segja að þrír menn hafi rænt sig í Aþenu í Grikklandi í gærkvöldi, og að ræningjarnir hafi dulbúið sig sem lögreglumenn. Myndatökumennirnir voru stöðvaðir af þremur mönnum sem töluðu spænsku og báðu um skilríki.

Gert að loka al-Jazeera í Bagdad

Írakska bráðabirgðastjórnin hefur skipað sjónvarpsstöðinni al-Jazeera að loka útibúi sínu í Bagdad í mánuð. Innanríkisráðuneytið greindi frá þessu í morgun og segir þetta gert til að koma í veg fyrir að arabíska sjónvarpsstöðin sýni myndir af gíslatökum, sem sé hvetjandi fyrir mannræningja. Höfuðstöðvar al-Jazeera eru í Qatar.

Falsaði eigin aftöku

Tuttugu og tveggja ára Bandaríkjamaður falsaði myndband sem sýndi hann hálshöggvinn af mannræningjum í Írak. Sjálfur segist hann hafa notað gerviblóð og að um grikk hafi verið að ræða. Írakska bráðabirgðastjórnin hefur lokað útibúi arabískrar sjónvarpsstöðvar, vegna birtinga slíkra myndbanda.

Sex lík í íbúð í Flórída

Sex lík fundust á heimili í Flórída í Bandaríkjunum í gær og gengur morðinginn laus. Farið var að grennslast fyrir í íbúðinni eftir að einn íbúanna mætti ekki til vinnu. Fjórir menn og tvær konur, á aldrinum 18 til 30 ára, fundust látin og segir lögreglan að fólkið hafi ekki framið sjálfsmorð.

Bakteríusýking völd að dauða 189

Slæm bakteríusýking hefur herjað á sjúkrahús og hjúkrunarheimili í Kanada á undanförnum mánuðum og er talið að 189 dauðsföll á 18 mánuðum, megi rekja til hennar, segir á fréttavefsíðu BBC í dag.

Skandall í ólympíunefndinni

Búlgarskur meðlimur Alþjóðaólympíunefndarinnar var í dag leystur frá störfum tímabundið, vegna ásakana um spillingu, sem komu fram í breskum heimildaþætti. Hann segist hafa spilað með í þeirri von að geta upplýst um mútutilraun.

Uppreisnarmenn fá sakaruppgjöf

Á næstu 30 dögum geta Írakar sem stutt hafa uppreisnarmenn fengið sakaruppgjöf. Þetta hefur verið tekið í lög og með þessu eiga minniháttar glæpamenn að geta hafið siðsamlegt líf á ný. Þeir sem geta sótt um sakaruppgjöf eru þeir sem versla með léttari vopn og sprengiefni auk þeirra sem hafa fjármagnað uppreisn að einhverju leiti.

Saman á ný eftir 7 ára fangelsi

Kennslukonan Mary Kay Letourneau  hefur fengið leyfi dómara í Seattle í Bandaríkjunum til að hitta sinn heittelskaða Vili Fualaau eftir sjö ára aðskilnað. Mary Kay er 43 ára og vakti ástarsamband hennar við Fualaau heimsathygli þegar það hófst fyrir 8 árum. Þá var hann einungis 13 ára gamall og nemandi Mary Kay. Hún varð ólétt og ól honum dóttur.

Sprengjur í ferðamannabæjum Spánar

Tvær litlar sprengjur sprungu í ferðamannabæjum á norðurströnd Spánar í dag. Engin meiðsl urðu á fólki en svo virðist sem ETA, hryðjuverkasamtök baskneskra aðskilnaðarsinna standi á bak við tilræðin og séu þar með að vakna til lífsins á ný.

Mótorhjólahundur léttir lundu

Chihuahua hundur á mótorhjóli léttir sjúklingum vistina, á sjúkrahúsi í Ohio í Bandaríkjunum. Hundurinn heitir Bangsi og fer um ganga spítalans á leikfangahjóli, sem er eftirlíking af Harley Davidson mótorhjóli.

Höfrungar stranda í Flórída

Um 30 höfrungar strönduðu á Palm Beach í Flórída í gær. Þeir strönduðu reyndar í annað sinn en áður höfðu hjálpsamir starfsmenn og gestir annars staðar á baðströndinni komið þeim á flot á ný. Höfrungarnir syntu um sex kílómetra leið norður með ströndinni en leituðu svo í land aftur.

Frakkar búa sig undir mikinn hita

Frakkar undirbúa sig fyrir væntanlega hitabylgju, en í fyrra létust um fimmtán þúsund manns vegna mikilla hita. Sérfræðingar hafa áhyggjur af því að ekki verði hægt að nýta um þriðjung sjúkraplássa vegna sumarfría í landinu. Í ágúst í fyrra fór hiti oft upp fyrir 40 gráður og spáð er svipaðri hitabylgju á næstunni.

Aldrei séð meiri fátækt

"Ég hef verið við hjálparstörf í suðurhluta Afríku í fjögur ár og hef aldrei séð jafn mikla fátækt," segir Hjördís Guðbjörnsdóttir hjúkrunarfræðingur en hún er einn þriggja sendifulltrúa Rauða kross Íslands í Darfurhéraði í Súdan. Hjördís sinnir heilsugæslu í Abshok flóttamannabúðunum í norðurhluta Darfur en um 50 þúsund manns eru nú í búðunum og fer fjölgandi.

Ráðherra segir af sér

Dómsmálaráðherra Palestínu, Nahed Arreyes, sagði af sér í gær eftir að hafa verið sviptur lykilvöldum að eigin sögn. Þó hann hafi ekki minnst á Arafat í afsögn sinni er óánægja hans talin stafa vegna þess að Arafat stofnaði hliðstætt ráðuneyti fyrir nokkrum mánuðum og hefur því tögl og hagldir í dómskerfinu.

Írakar veita sakaruppgjöf

Íraska bráðabirgðastjórnin hefur veitt þeim sem hafa framið minniháttar afbrot sakaruppgjöf. Sakaruppgjöfin nær ekki til þeirra sem hafa gerst sekir um manndráp. Vonast er til að þetta verði til þess að lægja ófriðarbálið í landinu.

Sviðsetti eigin aftöku

Myndband sem sýndi arabíska vígamenn taka Bandaríkjamann af lífi og fjölmiðlar um allan heim sögðu frá reyndist vera sviðsett. </font />

Réttað yfir föngum á Guantanamo

Blaðamenn fylgdust í gær í fyrsta sinn með réttarhöldum yfir stríðsföngum Bandaríkjamanna, sem þeir hafa haldið í fangelsinu á Guantanamo flóa á Kúbu án dóms og laga í meira en tvö ár. Myndatökur voru hins vegar ekki leyfðar í réttarsal.

Vill afsala sér ríkisborgararétti

Bobby Fisher, fyrrverandi heimsmeistari í skák, vill afsala sér bandarískum ríkisborgararétti að sögn lögmanns hans. Hann er nú í haldi í Japan fyrir að hafa framvísað þar útrunnu vegabréfi, að sögn bandarískra yfirvalda, þegar hann ætlaði að fara frá Japan til Filippseyja nýverið.

Hætta við nýbyggingar

Yfirvöld í Bangladess hafa hætt við fyrirhugaðar nýbyggingar í landinu en munu þess í stað nota fjármagnið til að laga skemmdir eftir mikil flóð sem hafa geisað þar undanfarið. Flætt hefur yfir tvo þriðju hluta landsins og hafa tæplega sjö hundruð manns farist.

Börn aftur í skólann

Börn í Paraguay fóru aftur í skólann í gær eftir þriggja daga þjóðarsorg í kjölfar þess að um 450 manns fórust í bruna í verslunarmiðstöð um síðustu helgi. Meðal hinna látna voru tæplega fimmtíu börn. Að minnsta kosti tuttugu og fimm foreldrar barna í Alþýðuskólanum í Paraguay létust í brunanum.

Fleiri hryðjuverkamenn handteknir

Lögreglan í Bretlandi handtók í gær þrettánda manninn sem grunaður er um aðild að hryðjuverkasamtökum. Handtakan kom í kjölfar handtökuskipunar frá Bandaríkjunum en maðurinn, Babar Ahmad sem er þrjátíu ára gamall, er grunaður um að hafa stundað fjáröflun fyrir hryðjuverk í Tsjetsjeníu og Afganistan frá 1998 til 2003.

Kettir klónaðir

Erfðarvísindafyrirtæki í Kaliforníuríki í Bandaríkjunum hefur í fyrsta sinn klónað tvo ketti en frumgerðin er kötturinn Tahini, köttur forstjóra fyrirtækisins. Markmiðið er að geta klónað gæludýr fyrir fólk sem finnst erfitt að sjá á eftir dýrunum sínum. Að sögn forstjórans ætlar fyrirtækið að klóna fleiri ketti síðar á árinu og verða sex þeirra seldir fyrir 500 þúsund íslenskar krónur hver.

Sharon gefur líklega eftir

Aríel Sharon, forsætisráðherra Ísraels, ætlar líklega að gefa Gaza-svæðið eftir til Palestínumanna og þess í stað að efla landnemabyggðir á Vesturbakkanum. Ísraelski herinn hefur að hluta dregið sig frá norður Gaza-svæðinu og Sharon heldur fast í áætlanir um að leggja niður landnemabyggðir á svæðinu.

Stöðugir bardagar í Írak

Einn bandarískur hermaður lést og 15 særðust í árásum uppreisnarmanna í Bagdad í Írak í gærkvöldi. Hermenn berjast nú við árásarmenn á nokkrum stöðum í Írak og ekkert lát er á árásum.

74 ára maður tekinn af lífi

Sjötíu og fjögurra ára gamall maður var tekinn af lífi í Alabama-ríki í Bandaríkjunum í gær. Hann er elsti maður sem tekinn hefur verið af lífi þar í landi síðan dauðarefsingar voru leiddar í lög á ný árið 1976. Maðurinn, sem hét James Hubbard, myrti 62 ára gamla konu fyrir tuttugu og sjö árum, þá 47 ára gamall.

Bannað að brosa í vegabréfum

Þeim sem hyggjast sækja um vegabréf í Bretlandi er nú bannað að brosa svo það sjáist í tennurnar á vegabréfsmyndum. Stofnunin sem sér um útgáfu vegabréfanna segir að með þessu sé verið að fara eftir nýjum bandarískum stöðlum sem banna mönnum að brosa út að eyrum. Ástæðan er sú að bros getur villt fyrir öryggismyndavélum og landamæravörðum.

Vann 2,5 milljarða í lottóinu

Stærsta lottóvinningi í Bretlandi og á Írlandi fyrr eða síðar var úthlutað í borginni Belfast á Norður-Írlandi í dag. Vinningsupphæðin var tveir og hálfur milljarður íslenskra króna og féll hann í hlut 58 ára gamallar konu sem er gift og á tvær uppkomnar dætur.

Án bóta í sex áratugi

Tæpum 60 árum eftir að kjarnorkusprengjum var varpað á Hiroshima og Nagasaki þjást sum eftirlifandi fórnarlömb árásanna enn án þess að fá nokkrar bætur eða aðstoð.

Fá að bera vopn á ný

Ísraelsk stjórnvöld hafa samþykkt að palestínskir lögreglumenn fái að bera vopn. Það hafa þau bannað síðustu þrjú árin. Shaul Mofaz, varnarmálaráðherra Ísraels, samþykkti breytinguna til að hjálpa Ahmed Qureia, forsætisráðherra Palestínu, að koma á röð og reglu á svæðum Palestínumanna.

A-Evrópumenn streyma til Danmerkur

Fleiri Austur-Evrópubúar hafa sótt um atvinnuleyfi í Danmörku í maí, júní og júlí eftir að tíu ný ríki fengu aðild að Evrópusambandinu fyrsta maí. Danska dagblaðið Jyllands posten greinir frá því í dag að tvö þúsund Austur-Evróubúar hafi sótt um atvinnuleyfi og fara flestir í landbúnaðarstörf.

Al-Sadr neitar miklu mannfalli

Talsmaður sjítaklerksins Moqtada al-Sadr neitar þeim fréttum Bandaríkjamanna að þrjú hundruð írakskir uppreisnarmenn hafi fallið í tveggja daga bardögum í borginni Najaf. Hann segir þrjátíu og sex af þeirra mönnum látna.