Sviðsetti eigin aftöku

Myndband sem sýndi arabíska vígamenn taka Bandaríkjamann af lífi og fjölmiðlar um allan heim sögðu frá reyndist vera sviðsett. Bandaríkjamaðurinn Benjamin Vanderford bjó myndbandið til en þar sést hvernig hann sjálfur er tekinn af lífi. Vanderford segist hafa sett myndbandið á netið fyrir nokkrum mánuðum í von um að draga að sér athygli og einnig til að sína hversu auðvelt er að falsa myndbönd af þessu tagi. Á myndbandinu sést Vanderford skjálfandi og hönd sem heldur hníf við háls hans og segir Vanderford að hernáminu í Írak verði að linna. Í myndbandinu segir hann það standa til boða að skipta honum fyrir írska uppreisnarmenn sem hafa verið handteknir. Vanderford notaði gerviblóð við sviðsetninguna sem var mynduð heima hjá vini hans og sagðist hafa átt við myndbandið til að draga úr gæðum þess og gera það líkara myndböndum sem hryðjuverkamenn hafa sent frá sér. Vanderford sér ekki ástæðu til að biðjast afsökunar á uppátækinu.