Uppreisnarmenn rændu Írana

Uppreisnarmenn í Írak segjast hafa rænt írönskum stjórnarerindreka. Írönsk yfirvöld hafa staðfest að starfsmanns þeirra sé saknað en hafa ekki gefið upp hvort þau telja að honum hafi verið rænt. Maðurinn hvarf á miðvikudag í síðustu viku þegar hann var á leið til Karbala frá Bagdad. Í gær tilkynnti uppreisnarhópur sem kallar sig islamska herinn í Írak að þeir hefðu manninn í haldi. Þeir munu víst ekki hafa hótað honum lífláti né farið fram á lausnargjald. Írönsk yfirvöld segjast ætla að rannsaka málið gaumgæfilega og komast að því hvort honum hafi verið rænt.