Hryðjuverkamenn gefa út geisladisk

Hryðjuverkasamtök hafa gefið út margmiðlunardisk þar sem múslimar eru hvattir til að grípa til vopna í heilögu stríðu gegn innrásarhernum í Írak og bandamönnum þeirra. Á diskinum er forsætisráðherra íröksku bráðabirgðastjórnarinnar hótað lífláti. Diskurinn heitir Vindar sigursins og er gefin út af hryðjuverkasamtökum Jórdanans al-Zarqawi, sem birtu í morgun falsað myndband af aftöku Bandaríkjamanns. Tölvugeisladiskurinn er 45 mínútna langur. Í upphafi eru birtar myndir af sprengingum Bandaríkjamanna í Írak og þulur segir íslamska hermenn ekki hætta í heilögu stríði fyrr en Íslam ríki á jörðu. Þá segjast samtökin standa að baki ýmsum árásum á bandalagsherinn í Írak og birtar eru myndir af nokkrum árásanna. Meðal annars af manni sem segist ætla að keyra vörubíl hlöðnum sprengiefni inná svæði Bandaríkjamanna í Bagdad. Hann sýnir meðal annars takkann sem hann þarf að ýta á til að sprengja bílinn upp. Aðgerðin sjálf er svo mynduð og lík mannsins sjö dögum síðar. Á íslömskum vefsíðum hefur mikið verið rætt um diskinn síðustu tvo mánuði en dagblað í Kúveit greindi frá honum fyrst í gær og sendi hann til AP fréttastofunnar í framhaldi. Ekki er vitað hvar diskurinn er framleiddur en honum er greinileg ætlað að hvetja menn til að ganga til liðs við samtökin.